महांकालया विवेकं शिल्ड ल्ह्वन

येँ (झीगु स्वनिगः)

श्री महांकाल मावि महाबूया विवेक लामां ५ क्वःगु स्वनिगः ब्याःगु मावि स्तरीय महांकाल रनिङ शिल्ड धेंधेंबल्लाः कासा त्याकूगु दु । स्वीस लीग कथं न्ह्याःगु ७ गू राउण्डया कासाय् लामाया ६-२६-११.५ खःसा अन्नपूर्ण ब्वनेकुथिया विजय डंगोल ६-२६-११ व ख्वपि्रङ ख्वपया राज प्रजापति ६-२४ ल्याः कयाः छसि कथं ल्यू व लियांल्यू लाःगु दु । नापं भानुभक्त मेमोरियलया तेजिना खड्का वेष्ट गर्ल, श्री महांकालया सुरुचि लामा वेष्ट जुनिययर, नेक्स जेनेरेशनया अमृत ज्ञवाली राइजिङ प्लेयर, सेन्ट मेरिज यलया इशा व इशानी -ट्वीन्स) तःकेहेँपिं स्पेशल ख्वाः, अले अन्नपूर्ण ब्वनेकुथिया प्यम्ह कासामिपाखें १९.५ ल्याः हयाः बेष्ट स्कूल जूगु दु ।

कासा न्हाप जूम्हेसित शिल्ड व दां २५००/-, ल्यू व लियाल्यू जूपिन्त दां १५००/- व १०००/- ब्यूगु खःसा त्याकुमि १ निसें १० तकयापिन्त अन्तर्राष्ट्रिय स्तरया चेस बोर्ड व गोति छज्वः छज्वः, त्याकुमि सकसितं ट्रफि व ब्वति काःपिं सकसितं दसिपौ नं लःल्हाःगु खः । कासाय् त्याःपिं कासामिपिन्त श्री महांकाल माविया ब्वनेकुथि ब्यवस्थापन समितिया नायः भाजु विपेन्द्र प्रकाश महर्जनजुं शिल्ड ट्रफि लःल्हानादीगु खः । हरिकृष्ण महर्जनया कजिसुइ न्ह्याःगु थुगु कासा वंगु १५ गते निसें स्वन्हुयंकं न्ह्याःगु खः । कासाया समापन ज्याझ्वःयात सहप्रअ उषा मालाकार-खड्कां) न्ह्याकादीगु खःसा प्रअ सन् मानन्धर सभा नायः जुयादीगु खः ।

More Stories Like this