सरकार विरुद्ध माओवादी सर्वोच्चय् माओवादीइ जिम्मेवारी हेरफेर

येँ (झीगु स्वनिगः)

एकीकृत नेकपा-माओवादीं) अनमिनया म्याद मतनेगु सरकारया निर्णय विरुद्ध सर्वोच्च अदालतय् मुद्दा दायर याइगु जूगु दु । पार्टीया ज्याकू पेरिसडाँडाय् आइतवाः च्वंगु स्थायी समितिया बैठकं सरकारं अनमिनया आवश्यकता मदुगू धासें छ्वःगु पौ शान्ति सम्झौता व अन्तरिम संविधान अःखः जूगु धासें सोमवाः सर्वोच्चय् मुद्दा दायर यायेगु निर्णय याःगु खः । अनमिन दुगु इलय् शान्ति प्रक्रियायात लिच्वलय् थ्यंकेत अःपुइगु धासें माओवादीं वइगु जेष्ठ १४ गते तक्क म्याद तनेमाःगु माग यानाः वयाच्वंगु खः । सरकारं धाःसा म्याद तनेमज्यूगु धासें अनमिनयात पत्राचार याःगु खः । उगु बैठकं एकीकृत नेकपा माओवादीं पार्टी नेतातय्गु भालाः हिलाबुला याःगु दु । कोटेश्वरया पेरिसडााडासं च्वंगु केन्द्रीय ज्याकुथिइ म्हिगः च्वंगु स्थायी समिति बैठकं नेतातय्गु भालाः सामान्य हिलाबुला याःगु खः ।

माओवादी छ्याञ्जे सीपी गजुरेल 'गौरबं' नायः पुष्पकमल दाहाल 'प्रचण्डं' नेतातय्गु भालाः हिलाबुलाया प्रस्ताव हःगु व उकिया लिपांगु क्वःछिना कन्हय् च्वनीगु केन्द्रीय समिति बैठकं यायेगु जानकारी बियादीगु दु । वय्कलं नायः प्रचण्डया प्रस्तावबारे धाःसा स्पष्ट यानादीगु मदु । थौं सुथसिया झिंछताः इलय् स्थायी समिति व छताः इलय् केन्द्रीय समिति बैठक च्वनेत्यंगु खः । अथेहे स्थायी समिति बैठकं पोलिटब्युरो दुजः खड्कबहादुर विश्वकर्मां गयाः वःगु बैधानिक गाडीयात अबैधानिक धकाः सरकारं कब्जाय् काःगुलिं घोर भत्र्सना नापं याःगु दु । मन्त्रिपरिषदया निर्णयकथं शान्ति मन्त्रालयं नापं सहमति बिइधुंकूगु गाडीयात सरकारं अबैधानिक धकाः कब्जाय् काःगु खँय् माओवादीं च्यूताः प्वंकूगु दु ।