पर्यटन दँ देय्न्यंक ज्याझ्वः

येँ (झीगु स्वनिगः)

नेपाल पर्यटन दँ २०११ शुभारम्भया लसताय् लाकाः देय्न्यंक थीथी ज्याझ्वःया ग्वसाः ग्वयाः हनाच्वंगु बुखँत वःगु दु । कावासोती - नेपाल पर्यटन दँ २०११ या न्हापांगु दिं म्हीग नवलपरासी दुहाँवःपिं पर्यटकतय्त स्वंगू पञ्चेबाजालिसे लसकुस याःगु खः । भारतपाखें नेपाः वःपिं पर्यटकतय्त त्रिवेणीधाम पर्यटन विकास समितिं त्रिवेणी नाकाय् स्वांया माला व ह्याउँगु सिन्हः तिकाः लसकुस याःगु खः । त्रिवेणी नाका जुयाः नेपाः वःपिं पर्यटकतय्त नवलपरासीया पर्यटकीयस्थलया अवलोकन भ्रमण याकेगु ज्या नं थनया पर्यटन विकास समितिं म्हीगनिसें न्ह्याकूगु दु । माघे संक्रान्ति व माघे औंसीइ थन धार्मिक पर्यटक अप्वः वइगु जूगुलिं उकिया प्रचार याःगु त्रिवेणीधाम पर्यटन विकास समितिया छ्याञ्जे सुरज कोहारं जानकारी बियादिल ।

नेपाल पर्यटन दँ २०११ सं नेपाल दुहाँवइपिं पर्यटकतय्त लसकुसया नितिं जिल्लाया प्रवेश नाका सुनवल, गैंडाकोट व त्रिवेणीइ स्वागतस्थल निर्माण याःगु दु । गैंडाकोटय् एकीकृत पर्यटन विकास समितिं थारू, ब्राम्हण, क्षेत्री लगायतया जातीय संस्कृति पिज्वइगु वसः पुनाः पर्यटकया लसकुस याःगु खः । स्वन्हुया प्याकेज ज्याझ्वः ज्वनाः नवलपरासीइ वःपिं पर्यटकतय्सं चितवन राष्ट्रिय निकुञ्जया मध्यवर्ती क्षेत्रय् जङ्गल सफारी यानाः किसि लिसे गैंडा स्वयेफइगु, भगवान् गौतमबुद्धया अस्तुधातु दुगु रामग्राम, हिन्दू धर्मालम्बीया नितिं त्रिवेणीधामया दर्शन व दृश्यावलोकन लिसे पैदलयात्राया नितिं देवचुली डाँडा व मौलाकालिका देगलय् चाःहिला आनन्द कायेफइगु धाःगु दु ।

काभ्रे - काभ्रे जिल्लाया दकले तःजाःगु थाय् बेथानचोक नारायणस्थानय् च्वापुलिसे म्हिताः पर्यटन दँया लसकुस याःगु दु । सरकारं सन् २०११ यात पर्यटन दँया रूपं घोषणा यायेधुंकाः हिमाल, तराई व पहाडी क्षेत्र छक्वलं स्वयेफइगु स्वद्वः व झिंच्यागू मिटर तःजाःगु उगु क्षेत्रय् आन्तरिक लिसे बाह्य पर्यटकया ब्वतिइ पदयात्रा ज्याझ्वः नापं ग्वसाः ग्वःगु खः । तेस्रो आँखा नेपाःया ग्वसालय् ढुङ्खर्कया गेल्डुङपाखें न्ह्याःगु उगु पदयात्राय् आन्तरिक लिसे विदेशी पर्यटक यानाः प्यसः म्हसिया ब्वति दुगु तेस्रो आँखा नेपालया नायः मधु आचार्यं धयादिल ।

वंगु स्वदँनिसें च्वापु खनेमदुगु नारायणस्थान क्षेत्रय् सन् २०११ या सुरुवातलिसे च्वापु गाया वयेवं पर्यटकतय्सं च्वापुलिसे न्ह्यइपुकाः पर्यटन दँया लसकुस याःगु खः । पर्यटकत थ्यंमथ्यं न्याघौया तप्यंगु तं गयाः नारायणस्थान थ्यंकूगु खः । पर्यटनविद् शिवशरण थापां पर्यटकीय क्षेत्रयारूपं विकास यायेगु नितिं नारायणस्थान तसकं उत्तम क्षेत्र जूगुलिं उकिया नितिं पूर्वाधार दयेकेत लिसे प्रचारप्रसार यायेत इनाप नापं यानादिल । तेस्रो आँखा नेपालं पर्यटन दँया लसताय् बेथानचोक नारायणस्थान लगायत महाभारत क्षेत्रय् पैदलमार्ग व भ्यूटावर निर्माण यायेगु लगायत काभ्रेपलाञ्चोक पर्यटन घोषणापत्र जारी नापं याःगु दु ।

धुन्चे (रसुवा) - थ्वहे लसताय् न्हापांगु खुसिइ धुन्चे थ्यंपिं निम्ह पर्यटकतय्त म्हीग थनं झः झः धायेक लसकुस याःगु दु । यलया कुपण्डोलस्थित ओआई ट्रेकिङ एजेन्सी मार्फत लाङटाङया झिन्हुया भ्रमणय् वःपिं अस्ट्रेलियन नागरिक जेनिफर गिरिङ व ज्योएलया सरकारी अधिकारी, सुरक्षा निकायया प्रमुख, राजनीतिक दलया प्रतिनिधि, समाजसेवी, पर्यटन व घोडा व्यवसायीतय्सं सिन्हः व खादा क्वखायेकाः झः झः धायेक लसकुस याःगु खः । विदेशी पर्यटकतय्त स्थानीय घोडा समितिं घोडाय् तयाः निगू किलोमिटर यात्रा याकूगु खः । लसकुस ज्याझ्वः लिपा सञ्चारकर्मीतय्त प्रतिक्रिया बियादिसें उम्ह पर्यटकं थःत थनया बासिन्दां याःगु स्वागत सत्कारयात थःपिंसं न्ह्याबलें हे उच्च महत्वया लिसे तयेगु धयादिल । अथेहे, पर्यटन दँयात ध्यानय् तयाः आगन्तुक पर्यटकया यात्रायात सहज दयेकेत पीम्ह स्वयाः आपालं घोडा तयार यानातःगु गोसाईंकुण्ड घोडचढी व्यवस्थापन समितिया नायः कान्छा तामाङं जानकारी बियादिल । उगु हे लसताय् सदरमुकामय् दर्जनौं घोडा प्रदर्शन नापं याःगु खः ।

नुवाकोट (त्रिशूली) - नेपाल पर्यटन दँ २०११ न्ह्याःगु हे लसताय् नुवाकोट होटल लिसे रेस्टुरेन्ट व्यवसायी सङ्घं म्हीग ढुङ्गेय् विदेशी पर्यटकतय्त लसकुस याःगु दु । त्रिशुलीया ढुङ्गेय् न्हापां थ्यंकः वःपिं प्यम्ह पर्यटकतय्त सङ्घयापाखें सभासद् जगदीश्वरनरसिंह केसीं खादा क्वखायेकाः लसकुस यानादीगु खः । जिल्लाय् वःपिं पर्यटकतय्त लक्ष्यित यानाः स्थानीय होटलतय्सं आवास लिसे नसाया बांलाःगु प्रबन्ध यायेत्यंगु सङ्घया नायः सन्तोष उप्रेतीं जानकारी बियादिल ।

More Stories Like this