सङ्कटय् लानाच्वंगु दु प्रजापतिया पेशा

ख्वप (झीगु स्वनिगः)

थनं दयेकातःगु चाया बसाःज्वलं व्यापार जुइगु म्हो जुयाः वयेवं प्रजापतिया परम्परागत पेशा हे सङ्कटय् लानाः वयाच्वंगु दु । प्लास्टिकया बजाः ज्वलं चाया बसाःज्वलं विस्थापन यानाः हयेवं प्रजापतिया पुख्याली पेशा सङ्कटय् लाःगु खः ।
चाया बसाःज्वलं दयेकाः स्वदेशी लिसे विदेशी पर्यटकतय्त आकर्षण याइपिं ख्वपया प्रजापति थौंकन्हय् थःगु पेशापाखें विमुख जुयाः वनाच्वंगु दु । ख्वप सूर्यमढीया ७५ दँया रामसुन्दर प्रजापतिं धयादिल, 'जिमिगु ल्हातय् शीप व कला निगुलिं दु तर छु यायेगु जिमिसं दयेकाःगु बसाःज्वलंप्रति उपभोक्ताया रुची म्हो जुयाः वनाच्वंगु दु व पेशापाखें विमुख जुइगु स्थिति वयेधुंकूगु दु ।' बजारय् धाःसा न्ह्यात्थेंज्याःगु प्लास्टिकया ज्वलं दंक भावं न्यायेदुगुलिं चाया बसाःज्वलंप्रति मनूतय्गु रुची म्हो जुयावंगु खः । थुगु पेशां म्वायेमफइगु अवस्था वयेवं थ्व पेशाया विकल्प मालेमाःगु थुगु समुदायया मनूतय्सं बिचाः प्वंकादी । चाया बसाःज्वलंया व्यापार म्हो जुयाः वयेवं थौंकन्हय् प्रजापति समुदायया न्हूगु पुस्ता थ्व ज्या यायेत छत्थिं हे ययेकाः च्वंगु मदु ।

परम्परागत चाया बसाःज्वलं दयेकीपिं प्रजापतित ख्वपया तालाक्व -कुमाले टोल), सूर्यमढी, निकोसेरा, बोडे, चपाचो, बालकुमारी, लोकन्थली, नगदेश लगायतया थीथी थासय् यानाः करिब पीद्वःया हाराहारीइ दु । न्हापा - न्हापा प्रजापतितय्गु चाया बसाःज्वलं दयेकेगु पेशां स्वदेशी जक मजूसे विदेशी पर्यटकयात मन त्याकेत ताःलाःगु ख्वपया स्थानीय हरेराम प्रजापतिं जानकारी बियादिल । प्रमुख आयआर्जनया रूपं दुगु प्रजापतिया परम्परागत चाया बसाःज्वलं जन्मनिसें मृत्यु पर्यन्ततकं माः । तर थौंकन्हय् थथे मजुसे ज्याय् जक चाया बसाज्वलं छ्यलेगु यानाच्वंगु खनेदु ।

मचांनिसें हे चाय् म्हिताः न्हू न्हूगु रूप व आकार प्रकारया चाया बसाःज्वलं दयेकाः वयाच्वंम्ह तालाक्वया शिवराम प्रजापतिं थ्व पेशां म्वायेत तसकं थाकुयाः वःगु वय्कलं जानकारी बियादिल । ज्यानया बाजी लगय् यानाः हाकुगु चा लिकायेगु याना, खुला न्ह्यःनिसें चा अथें थन्कय् यानातयेगु व बसाःज्वलं दयेकेगु तर वहे बसाःज्वलंया व्यापार जुइमखु । थुकिं यानाः थ्व पेशापाखें जक म्वायेत तसकं मुश्किल जूगु दु - वय्कलं धयादी । छुं ई न्ह्यः थुखे विदेशी पर्यटकतय्गु आवागमनय् वृद्धि जुयाः वयेवं ख्वपया प्रजापतितय्सं दयेकूगु चाया चिचीधिकःपिं मूर्ति, पशुपंक्षी, जनावर, कतांमरि लगायतया पर्यटकीय आर्कषणया सामानया बिक्री धाःसा जुइगु यानाच्वंगु व्यवसायीतय्सं जानकारी ब्यूगु दु ।

More Stories Like this