भारतं हस्तक्षेप अप्वयेकीन

नेपालय् दलाल प्रवृत्ति अप्वःया वनाच्वंगु सन्दर्भय् भारतं थप हस्तक्षेपया ग्वसाः न्ह्यनेहये त्यंगु दु । नेपाली कांग्रेस, एमाले, तमोलोपा, फोरम लगायत संसदीय दलत आन्तरिकरुपं फुट व संघर्षया दथुं न्ह्याः वनाच्वंगु इलय् भारत थःगु हाकुगु ग्वसाः कार्यान्वयनपाखे यंकेगु संकट वःगु खः । भारतं नेपाःयात थःगु सुरक्षा कुसादुने तयेत सनाच्वंगु व निगूगु सिक्किमीकरणया लापुइ यंकेत स्वयाच्वंगुया झ्वलय् हालै नेपाः दुने हस्तक्षेप यायेगु विषय वस्तुयात भारतं न्हापांगु प्राथमिकताया घलय् तयातःगु सीदु । वहुसंख्यक संसदीय दलत भारतया इसाराय् प्याखं ल्हुयावीगु वातावरण सृजना जुयाच्वंगु इलय् राष्ट्रिय स्वाधिनताया खाय् माओवादी याकःचा जुइवं भारतं थथ्य थप हस्तक्षेपया ग्वसाःत न्ह्यःनेहयाः साम्राज्यवादी अमेरिकाया चाहनायात नं पूवंकेवीगु तःधंगु अवसरकथं कया वयाच्वंगु दु । अमेरिकां तिब्वतया हुलदागा यानाः छख्य भारतया धर्मशालाय् शरणार्थीया रुपय् च्वना च्वंम्ह धर्मगुरु दलाइ लामायात लय्तायेकेेत तिब्वतय् अशान्त याकाः चीनिया सरकारयात सतकय् क्वथायेत स्वयाच्वंगु दु । तिब्वतय् बदनाम यायेगु, आर्थिकरुपं कमजोर यायेगु आदि मौैका पियाच्वंम्ह अमेरिकां भारतयात थीथी लोभ क्यनाः धाप नकेगु ज्या यानावयाच्वंगु दु । भारतं नं थःगु उद्देश्य नं पूवनीगु अमेरिकाया ग्वाहालि नं दैगु कारणं नुगः चायेकाः थुखेपाखे हे लगय् जुयाच्वंगु स्पष्ट दु । थुज्वःगु स्थितिइ राष्ट्रिय स्वाधिनताया नितिं सः तयावयाच्वंम्ह माओवादीं थप योजना व ज्याझ्वः दयेकेमाःगु खँय् ध्यान केन्दि्रत यायेगु अत्यावश्यक खनेदु ।

भारतया उगु विषययात कयाः हालै अनया टाइम्स अझ इण्डियाया अनलाइन मार्फत उगु खा प्रकाशनय् हःगु खः । नेपाःयात भारतं न्हापांगु प्राथमिकताय् तःगु धयागु थप हस्तक्षेपया तयारी हे खः । थुकी थीथी राजनीतिक विश्लेषकपिसं नं सहमति प्वंकूगु दु ।
वयकःपिनिगु विश्लेषणकथं नेपाःयात थःगु दवावय् तयेगु, आर्थिकरुरुपं बजार दयेकेगु, कुनीतिक रुपय् थःगु पाल्हातय् तयातयेगु व सामरिक रुपं नेपाःयात थनेहे मबीगु भारतया लिपांगु ग्वसाः खः । भारतया थुगु हस्तक्षेप लिपा संसदीय दलतय्सं भारतप्रति न्ह्याक्कोहे भक्तिभाव क्यनाः दलाली याःसा उगु पार्टीत दुनेहे तःधंगु फुट, विरोध व संघर्ष जुइगु लकस वइगु खनेदु । मधेसवादी दलत छगू धुंकाः मेगु फुटं संकट न्ह्यःनेवःगु दुसा, कांग्रेेस - एमाले दुने नं राष्ट्रिय भावनाया पक्षपातित छगू धुंकाः मेगु दनावयेवं उगु पार्टीत न टुटफुटया दथ्वीं वनीगु निश्चित खः । उगु टुटफुटयात हे ध्यानय् तयाः भारतं न्हूगु रणनीति दयेके त्यंगु आभाष बी ।

तर वं विचाः याःथें स्वयाः अप्वः नेपालय् विरोधया सामना यायेमालीगु व राष्ट्रिय युद्ध ल्वायेत नेपाली जनतायात वाध्य यंकीगु नं उलिहे सम्भावना न्ह्यःनेवःगु दु । भारत नेपाःया धात्थेंम्ह मित्र जुइगु लाकि शत्रुया रुपय् डेढ करोड नेपाःमि जनताया घृणाया पात्र जुइगु ? थुगु खँया निर्णय अनया सत्ताधारीतय्सं याइगु व्यवहार व काइगु नीतिं स्पष्ट याइ । भारतं सिक्किमय् सिक्किमीकरण याःथें वा भुटानय् भुटानीकरण याःथें उलि याउँक नेपालय् सहज मजुइगु व छगू तःहाकःगु राष्ट्रिय युद्ध ल्वायेत नेपाली जनता तयार दुगु खायात भारतं गवलें नं लोमंके मज्यू ।

More Stories Like this