नेवाः आन्दोलनय् एमाले मदु धायेवं हुटिङ

किपू (झीगु स्वनिगः)

नेवाः स्वायत्त राज्यया अवधारणा कथं अभ्यासया कुतः यायेगु नापं उकिया नितिं आन्दोलन यानाः वयाच्वंगु नेवाः स्वायत्त राज्य मंकाः परिषद् किपुलिइ नेकपा -एमाले) मदु धकाः एमालेया किपू नगर कमिटीया छ्याञ्जे सुरेन्द्र मानन्धरं सार्वजनिक रुपं न्वंवानादीवं किपूमितय्सं हुटिङ यात । वंगु शनिवाः किपूया लाय्कू लागाय् किपू महोत्सवया बारे याःगु खुल्ला बहस ज्याझ्वलय् अथे एमालेया स्थानीय नेतां न्वंवानादीवं अथे जनतातय्सं हुटिङ याःगु खः ।

नेकपा -एमाले)या जातीय मोर्चा नेपाः लोकतान्त्रिक नेवाः संघ खःसा उगु संघया आधिकारीक प्रतिनिधित नेवाः स्वायत्त राज्य मंकाः परिषदय् दुथ्यानाच्वंगु नापं नेवाः स्वायत्त राज्यया आन्दोलनय् सक्रिय जुयाच्वंगु दयेक दयेकं हे मानन्धरं अथे एमाले नेवाः स्वायत्त राज्यया आन्दोलनय् मदु धैगु आशय् प्वंकादीवं हे उगु कथं हुटिङ यायेगु ज्या जूगु खः । अथे एमालेया स्थानीय नेता मानन्धरं न्वंवानादीवं नेवाः स्वायत्त राज्य मंकाः परिषद किपूया नायः पुचःया कजि पञ्चलाल महर्जनं परिषद् दुने एमालेया नेपाः लोकतान्त्रिक नेवाः संघया आधिकारीक प्रतिनिधित दुथ्यानाच्वंगु दु धकाः धायेवं छगू कथं एमाले दुथ्यानाच्वंगु दु ला वा मदु धैगु खँय् कचवं तकं जूगु खः । अथे एमालेया स्थानीय नेतां मंकाः परिषदय् एमाले मदु धकाः सार्वजनिक रुपं हे न्वंवानादीवं धात्थें परिषदय् एमाले दुथ्यानाच्वंगु दु ला कि मदु धैगु खँय् स्थानीय कार्यकर्तात अलमलय् लागु दु ।

एमालेया प्रतिनिधित मंकाः परिषदय् दुथ्यानाच्वंगु दयेक दयेकं अथे एमालेया प्रतिनिधि मदु धकाः न्वंवायेवं आः एमालेया स्थानीय नेतात जनतायात झंगः लायेत जक अथे वनाच्वंगु खः बाय् मानन्धरं धाःगु गलत खः ? मंकाः परिषदय् दुथ्यानाच्वंपिं प्रतिनिधितय्सं गुगु कथं काइगु खः व धाःसा स्वये ल्यं हे दनि ।