सु नं नेतायात कारबाही यायेगु प्रस्ताव मवः : अध्यक्ष प्रचण्ड

येँ (झीगु स्वनिगः)

एकीकृत नेकपा माओवादीया नायः पुष्पकमल दाहाल प्रचण्डं पार्टीदुने सु नं नेतायात कारबाही यायेगु प्रस्ताव महःगु स्पष्ट यानादीगु दु । अखिल क्रान्तिकारीपाखें म्हिगः येँय् ग्वसाः ग्वःगु तुच्चा ज्याझ्वलय् नायः प्रचण्डं कम्युनिष्ट पार्टीदुने जुइगु स्वभाविक बहसयात अश्वाभाविक प्रचार याःगु न्ह्यथनादिसें स्थाई समितिं गलत प्रचारया खारेज याःगु धयादीगु दु । नायः प्रचण्डं झिद ताःहाकःगु जनयुद्ध नं पार्टीदुने एकता, संघर्ष व हिउपाः जुयाः न्ह्यःने न्ह्याःगु न्ह्यथनादिसें उगु इलय् नं माओवादी विरुद्ध गलत प्रचारबाजी जुइगु यानाच्वंगु न्ह्यथनादीगु दु । थ्व स्वयाः न्ह्यः छुं सञ्चार माध्यमतय्सं माओवादी न्वकु बाबुराम भट्टराईविरुद्ध कारबाही जुइत्यंगु प्रचार याःगु खः ।

ज्याझ्वलय् अखिल क्रान्तिकारीया न्हूम्ह नायः हिमाल शर्मां शान्ति व संविधानदथुइ कुठाराघात जूसा अखिल क्रान्तिकारी प्रतिरोधय् कुहाावयेगु प्रतिबद्धता प्वंकादीगु दु । तुच्चा ज्याझ्वलय् माओवादीया नेतात, त्रिभुवन विश्वविद्यालय लगायत थीथी शैक्षिक संस्थाया प्राध्यापक लिसे शिक्षाविद्, विद्यार्थी लगायतपिनिगु ब्वति दुगु खः ।