किसानतय्गु आन्दोलनय् प्रहरीपाखें गोली प्रहार
येँ (झीगु स्वनिगः)
तुया भाः थकायेमाः धकाः माग यानाः सतकय् क्वहांवःपिं सर्लाहीया किसानतय्त अनया प्रहरीया गोली प्रहारयानाः घाःपाः याःगु दु । हरिऔन लागाय् म्हिगः आइतवाः जूगु प्रहरीं हस्तक्षेपय् लानाः ४० म्ह किसानतय्त घाःपाः जूगु खः धाःसा उगू ल्वापु उगू थासय् तनाव ब्वलंगु खः ।
पूर्व पश्चिम राजमार्गय् सतकय् तुमा हे ज्वनाः वःगु किसानत नापं ल्वापु जूगु खःसा प्रहरीं खुगू राउण्ड टियर ग्याँस तकं प्रहार याःगु खः । तुया खेती याइपिं किसानतय्सं सतकय् गाडा, ट्याक्टर तकं बेथां बेथां दिकाः प्रदर्शन याःगु खः । किसानतय्सं चरणबद्धरुपं आन्दोलन याना वयाच्वंगु खःसा आन्दोलन झन झन हे तच्वयेका यंकाच्वंगु दु । थ्व हे झ्वलय् पुस २० गतेनिसें पूर्वपश्चिम राजमार्ग अनिश्चितकालीन बन्द यायेगु घोषणा याःगु दु ।
तु उत्पादन याइपिं किसानतय्सं प्रति क्विन्टन तुया प्यसः व नीछतका यायेमाःगु माग यानाः अथे आन्दोलनय् क्वहां वयाच्वंगु खः । हरिऔनय् इन्दु शंकर चिनी उद्योग संचाल जुयाच्वंगु खःसा किसानतय्सं आन्दोलन याःगुलिं उगु उद्योग वंगुु मंसीर महिनाया न्हापांगु वाःनिसें हे बन्द जुयाच्वंगु दु ।
