'एमालें जनताया झंगः लानाच्वन’
येँ (झीगु स्वनिगः)
नेपाली कांग्रेसया संसदीय दलया नेता नापं प्रधानमन्त्रीया उम्मेदवार रामचन्द्र पौडेलं वर्तमान कामचलाउ सरकारया नेतृत्व यानाच्वंगु नेकपा -एमालें) सहमतिया नाय्खिं च्वयेकेगु ज्या जक यानाच्वन धकाः धयादीगु दु । म्हिगः आइतवाः मेलमिलाप दिवसया लसताय् येँय् जूगु छगू ज्याझ्वलय् न्वंवायेगु झ्वलय् वय्कलं आःया अवस्थाय् सहमतिया नारा बियाः एमालें जनतायात झंगः लायेगु ज्या यानाच्वंगु बाहेक छुं हे यानाच्वंगु मदु धकाः नं धयादिल ।
कांग्रेसया नेता पौडेलं एमालें सहमतिया माला जपेयायां हे उगु पार्टीया नायः झलनाथ खनालं प्रधानमन्त्रीया पद त्वःताछ्वयेमाःगु अले एमालेया हे वरिष्ठ नेता माधवकुमार नेपालं प्रधानमन्त्रीया पदं राजीनामा बिइमाःगु खः धकाः नं न्ह्यथानादिसें एमालेया आलोचना याःगु खः ।
