नागरिकताय् प्रदेशया म्हसीका मतयेगु कुतः

येँ (झीगु स्वनिगः)

संघीय गणतान्त्रिक नेपाःया नागरिकताय् प्रदेशया म्हसीका मतयेगु नितिं कुतः कथं संविधानसभाया २८ दलया मुँज्याय् ततःधंगु दलया नेतातय्सं चिचीधंगु दलया नेतातय्त न्वंवाकेगु ज्या म्हिगः आइतवाः निसें शुरु याःगु दु । नेपाःया आदिवासी जनजाति, मधेसी नापं ल्यूने लानाच्वंगु समुदायया माग कथं जातीय म्हसीकाया आधारय् स्वायत्त प्रदेशत दयेके मजिउ धकाः संघीयता विरुद्ध हे भूमिका म्हिताः वयाच्वंगु चिचीधंगु दलयात संघीयता विरोधी नेतातय्सं प्रयोग यानाः अथे नागरिकताय् प्रदेशया म्हसीका मतयेगु कुतः यानाहःगु खः धकाः छम्ह नेतां धयादीगु दु । म्हिगः जूगु २८ दलया मुज्याय् अथे नागरिकताय् प्रदेशया म्हसीका तयेमजिउ धकाः चिचीधंगु दल राष्ट्रिय जनमोर्चा, चुरेभावर पार्टी, नेपाल परिवार दल, नेकपा -माले), नेकपा -संयुक्त), राष्ट्रिय जनशक्ति पार्टीया नेतातय्सं सः तःगु खः ।

न्हूगु संविधान दयेकेगु नितिं विवाद जुयाच्वंगु विषययात ज्यंकेत धकाः एकीकृत माओवादीया नायः पुष्प कमल दाहाल प्रचण्डया नेतृत्वय् दयेकूगु न्हय्गू दलया उच्च स्तरीय राजनीतिक कार्यदलं तकं नागरिकताय् प्रदेशया म्हसीका दुथ्याकेगु धकाः सहमति यानाः अथे २८ दलया मुँज्याय् प्रस्तावया रुपय् हःगु खःसा उकियात संघीयता विरोधी दलया नेतातय्सं विरोध याःगु खः धकाः छम्ह नेतां कनादीगु दु । सिंहदरवारय् च्वंगु उगु मुँज्याय् तराई मधेस लोकतान्त्रिक पार्टी तज्यानाः गठन जूगु न्हूगु दल तराई मधेस लोकतान्त्रिक पार्टी नेपालया प्रतिनिधिं नं ब्वति कयादीगु खः । म्हिगःया मुँज्याय् नं न्यायपालिका सम्वन्धि विवाद ज्यंके मफूगु खः । थौं सुथय् नं हाकनं मुँज्या च्वनीगु जूगु दु ।