सफल जुइ ला थ्व पर्यटन वर्ष?
नेपाःया स्यना वंगु पर्यटन उद्योग व नेपाःया छबीयात हानं छक्वः पुलांगु हे थासय् हयाः बांलाकेगु ताः तयाः नेपालं थुगु दँ सन् २०११ यात 'पर्यटन वर्ष' या रुपय् माने यायेगु ताः तःगु दु। थ्वहे ताः तयाः म्हिगःनिसें शुरु जूगु इस्वी सन्या न्हूदँनिसें पर्यटन वर्ष नं शुरु जूगु दु ।
खतुं थ्व दछिया दुने झिगू लाख पर्यटक दुकायेगु धकाः सरकारं तःधंगु महत्वाकांक्षी योजना तःगु दु। तर नेपाल वायुसेवा निगमं पर्यटन वर्षयात लक्षित यानाः जहाज न्यायेगु धकाः कुतः याःम्ह प्रमुख अधिकारीतय् विरुद्ध भ्रष्टाचारया द्वपं बियाः मुद्दा दर्ता यायेवं पर्यटन वर्षया आरम्भ हे अलक्षिण जूवंगु दु। वास्तवय् राज्यं तइगु छुं नं कथंया राष्ट्र विकासया ग्वसाःयात विफल यायेगु लागिं थ्वहे देय् दुने थीथी कथंया तत्वत सक्रिय जुयाच्वंगु दु धइगु खँ थ्व घटनां प्रस्ट याना बिउगु दु। वास्तवय् अख्तियारं नेवानि विरुद्ध दर्ता याःगु भ्रष्टाचारया थ्व मुद्दा धइगु हे पर्यटन वर्ष असफल जूवनीगु न्हापांगु संकेत खः। पर्यटन वर्ष हनेगु थ्व ग्वसाः छुं हे तयारी मयासे केवल हचुवा व हल्लाया भरय् जक जुयाच्वंगु खः धइगु खँ थुकिं बांलाक हे क्यना बिउगु दु ।
सम्पूर्ण उद्योग व्यवसाय धरासायी जुयाच्वंगु थौंया इलय् पर्यटन छगू हे जक अज्याःगु उद्योग खः गुकिं नेपाःया छुं भचा आर्थिक उन्नति याइ लाकि धकाः आशा कायेथाय् दु। थ्वहे आशायात जीवन्त यायेत पर्यटन वर्ष हनेगु धकाः हःगु ग्वसाः धाथें नं च्वछाये बहः जू। तर राजनीतिक पार्टीतय् बन्द हडताल, राज्यया कमजोर तयारी व थ्वलिसे सम्बन्धित निकायतय् स्यनाच्वंगु तालमेलं थ्व वर्षयात गुलि सफल याइगु खः, व धाःसा शंकाया हे विषय तिनि ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
