नागरिकताया खँय् २७ दलय् विवाद
न्यायपालिकाया सवालय् विवाद यथावत
येँ (सन्ध्या टाइम्स)/संविधान दयेकेगु झ्वलय् विवाद जुयाच्वंगु विषयत ज्यंकेगु नितिं धकाः थौं च्वंगु २७ दलया बैठकय् नागरिकताया सवालय् विवाद जूगु दु ।
विवाद ज्यंकेगु नितिं धकाः न्हय्गू दलया उच्चस्तरीय कार्यदलं सहमति ब्वलंका हःगु नागरिकता सम्बन्धि प्रस्तावयात कयाः चिचीधंगु दलतय्सं आपत्ति प्वंकेवं विवाद जूगु खः। संघीय गणतान्त्रिक नेपाःया प्रदेशया पहिचान सहित नागरिकता बीगु धकाः उच्चस्तरीय राजनीतिक कार्यदलं हःगु प्रस्तावयात कयाः विशेष यानाः जातीय आधारय् संघीयता दयेके मजिउ धकाः सः तया वयाच्वंगु चिचीधंगु दलया नेतातय्सं विरोध याःगु खः ।
नागरिकताय् प्रदेशया पहिचान तये मजिउ धकाः विवाद याःगु पार्टीत राष्ट्रिय जनमोर्चा, नेकपा (माले), राष्ट्रिय जनमुक्ति पार्टी, चुरे भावर पार्टी, नेकपा (संयुक्त) नापं मेमेपिं खः धकाः उगु मुँज्याय् ब्वति कयादीम्ह छम्ह नेतां कनादीगु दु। थौंया बैठकय् उच्चस्तरीय राजनीतिक कार्यदलय् सहमति जूकथं तःगु प्रस्तावयात कयाः नागरिकताया सवालय् विदेशी मिसां नेपाःया मिजंलिसे इहिपा यात धाःसा अथें हे नागरिकता दइगु अले विदेशी मिजंलिसे नेपाःमि मिसां इहिपा यात धाःसा १५ दँ लिपा जक नागरिकता दइगु प्रावधान लैंगिक रुपं विभेद जुल धकाः नेतातय्सं तर्क तयेवं विवाद जूगु खः। सिंहदरवारया राज्य व्यवस्था समितिइ जूगु बैठकय् न्यायपालिकाया सवालय् नं सहलह जूसां विवाद धाःसा यथावत हे जूगु दु ।
न्यायपालिकाया सवालय् उच्चस्तरीय राजनीतिक कार्यदलय् दुथ्याःगु दलतय् दथुइ हे थःथःगु कथंया व्याख्यां यानाः विवाद जुयाच्वंगु खः। बैठकय् खास यानाः चिचीधंगु दलया नेतातय्सं थःथःगु बिचाः प्वंकूगु खःसा कन्हय् सुथय् हाकनं २७ दलया बैठक च्वनीगु जूगु दु ।
