समस्या समाधान याये माल

सम्पादकजु,

छखा हे छेँय् काय म्ह्याय्पिं यक्व दत कि छेँया हामायात साप थाकुइ । कायिपंसं अंश माल धकाः कचकच याइगु म्ह्याय्पिंत खःथाय् जिउथाय् बिया छ्वयेगु तन्ता ध्यबा दुपिंत छु निं छु गरीबया छेँ जूसा झन हे थाकु । उकीमाथि जःलाखःलाया ध्याचू न्यने मालीगु थ्व जुल छेँया हामायात जुयाच्वनीगु मर्का । आः देय्या हामायात जुयाच्वंगु मर्का कायिपं ग्वाःग्वाः दु थें थौंकन्हय् झीगु देसय् नं नीन्यागू पार्टी दयेधुंकल । थ्व धइगु नीन्याम्ह कायिपं दुगु सरह खः । छखा छेँय् ला कायिपं ग्वाःग्वाः दत कि मिले याना तये थाकु धाःसा देय्या हामा जुयाच्वंम्ह प्रधानमन्त्री भाजु प्रचण्डयात देशय् शासन चले यायेत गुलि जक थाकु जुइ ? थथे जुयाः जुइ वय्कलं न्ह्यागु पार्टीयात व न्ह्यागु हे पुचःयात नं माग पुरे याना बी धकाः आश्वासन बीगु । थथे मयाःसां आन्दोलन याइ धकाः ग्यायेमालीगु जुल ।

बल्ल बल्ल वःगु लोकतन्त्रयात क्वातुक व बल्लाक चले यानाः देय्या जनतायात सुख व शान्तिया अनुभव याकेगुली नीन्यागू पार्टीया नायःत छप्पँ जुया दीमाल ।

अले सरकार चले यानाच्वंगु पार्टी नं थःपिंसं पुरा याये मफइगु छुं नं ज्याझ्वः व सहलह मयासे हथासं निर्णय यायेगु बानी त्वःता छ्वयेमाल गुगु निर्णय न्यनाः मेमेगु पार्टीयात चित बुझे याये थाकुगु व जनताया मनय् ग्याःचिकु जुइक धन्दा कायेमालीगु अवस्था मवयेमाल ।

- कृष्णमान डंगोल, मखं गल्लितुन्छेबहाः यॆ ।

More Stories Like this