खुक्वःगु राष्ट्रिय भलिबल कासाया उलेज्या पासाङपाखें

धनगढी (झीगु स्वनिगः)

जनमुक्ति सेना नेपालया प्रमुख नन्दकिशोर पुन 'पासाङं' शान्तिप्रक्रियायात लिच्वः विइत व संविधानसभापाखें जनताया संविधान च्वयेगु नितिं कासामि पिनिगु पाखें नं दबाव विइमाःगु धाःगु दु । शान्ति व संविधानया नितिं कासा खेलय् भूमिका महत्वपूर्ण जुइगु धयादिल ।
सनिवाः निसें येँया गोङ्गबुं न्ह्याकूगु ढोरपाटन युवा क्लवपाखें ग्वसाः ग्वःगु खुक्वःगु राष्ट्रिय भलिबल कासाया उलेज्या यासें जनसेनाया प्रमुख पासाङं कासामितय्त शान्ति व संविधानया नितिं दबाब विइत इनाप यानादिल । नापं थौंकन्हे शान्तिप्रक्रियाय् ब्वलनाः च्वंगु पंगः ज्यंकेगु नितिं संविधानसभां जनताया संविधान दयेकेगु नितिं ब्यापक जनदबाब बिइमाःगु नं धयादिल ।

कासामि धइपिं देय्या म्हसीका जूगु धयादिसें पासाङं राज्यं कासामितय्त सम्मान याये मफूगु व उमिगु भविष्यया ग्यारेण्टी यायेमफूगु धयादिल । राज्यं यानाः हे नेपाःया कासा क्षेत्रया विकास जुइ मफूगु धयादिसें जनमुक्ति सेना प्रमुख पासाङं राज्यं कासामि, कासाया प्रशिक्षकतय्त सम्मान व उमिगु नितिं लगानी यानाः भविष्यया ग्यारेण्टी यायेमाःगु धयादिल । पुस २७ गतेतक्क न्ह्याइगु उगु मिसा राष्ट्रिय भलिबल कासा नेपाःया हे दकले तःधंगु राशीया भलिबल कासा खः । थुकिं न्हापांगु टिमयात नीगु लख स्वःद्वः पुरस्कार क्वछिना तःगु खः । उत्कृष्ट कासामियात छग्वः स्कुटर विइगु क्लबया नायः मनवीर छन्त्यालं जानकारी बियादिल ।

More Stories Like this