एमाओवादी स्थायी समिति बैठक हाकनं लिछ्यात
येँ (झीगु स्वनिगः)
एकीकृत नेकपा -माओवादी)या स्थायी समिति बैठक आइतबाः न्हिनसिया झिंनिताः ईतक्कया नितिं स्थगित जूगु दु । पार्टीदुनेया माःगु गृहकार्य पूवंके मफूगुलिं शनिवाःया बैठक स्थगित जूगु न्वकु नारायणकाजी श्रेष्ठं जानकारी बियादीगु खः । थ्व स्वयाः न्ह्यः थ्वहे पुस १४ गते बुधबाः च्वने धयातःगु स्थायी समिति बैठक नं आन्तरिक गृहकार्य पूमवंगु हुनि क्यनाः शनिवाः नितिं चीकूगु खः । स्थायी समिति बैठकं पार्टीया वइगु कार्ययोजना, पार्टी नेतातय्गु साङ्गठनिक जिम्मेवारी हिलाबुला, पार्टीं देय्व्यापी यायेगु धयातःगु शान्तिपूर्ण आन्दोलन लिसे राजनीतिक - वैचारिक प्रशिक्षण व समसामयिक राजनीतिक विषयलय् न्हूगु निर्णय यायेगु जानकारी ब्यूगु खः ।
स्थायी समिति बैठक च्वनेमफयाः एकीकृत नेकपा माओवादीं शान्ति व संविधानया सुनिश्चितताया नितिं देय्व्यापी यायेगु धयातःगु शान्तिपूर्ण आन्दोलन व राजनीतिक - वैचारिक प्रशिक्षण नापं प्रभावित जूगु दु । छाय्धाःसा वंगु मङ्सिरय् क्वचाःगु पार्टीया खुक्वःगु विस्तारित बैठकया कार्यादेशकथं एकीकृत नेकपा माओवादीं आःतक्क आन्दोलनया ज्याझ्वः घोषणा यायेफूगु मदुनि । थ्वहे पुस १६ गतेनिसें यायेगु धयातःगु प्रशिक्षण नं अनिश्चितकालतक्कया नितिं स्थगित जूगु दु ।
