ख्वपया पर्यटन शुल्कय् शतप्रतिशत वृद्धि

ख्वप (झीगु स्वनिगः)

पर्यटन दँ २०११ या लसताय् लाकाः ख्वप नगरपालिकां म्हिगः जनवरी १ निसें लागू जुइकथं पर्यटन शुल्कय् शतप्रतिशत वृद्धि याःगु दु । नगरपालिकां ख्वप नगरय् वइपिं पर्यटकतय्के कयाः वयाच्वंगु शुल्कय् म्हिगःनिसें वृद्धि याःगु पर्यटन सेवा केन्द्रया प्रमुख गौतमप्रसाद लासिवां धयादिल ।

नगरपालिकां २०५७ साल पुस १ गतेनिसें सार्क राष्ट्र व चीनियाँ पर्यटकतय्के प्रतिव्यक्ति न्यय्तका लिसे मेमेगु राष्ट्रया पर्यटकतय्के न्हय्सः व न्यय्तका कयाः वयाच्वंगु खः । म्हिगःनिसें लागू जुइकथं नगरपालिकां सार्क राष्ट्र व चीनियाँ पर्यटकतय्के प्रतिव्यक्ति सच्छि तका लिसे मेमेगु राष्ट्रया पर्यटकतय्के झिंछसः तका शुल्क कायेगु याःगु दु ।

नगरपालिकां २०५० सालनिसें म्हयाः वयाच्वंगु पर्यटन शुल्कय् न्हापां पर्यटकतय्के न्यय्तका काःगु खःसा २०५३ सालय् थकयाः स्वसः तका धेबा थ्यंकूगु खः । नगरपालिकां पर्यटन शुल्कपाखें जक दच्छिया च्यागू करोड स्वयाः आपालं राजस्व सङ्कलन यायेगु यानाच्वंगु दु ।
शुल्क बापत आःतक्क च्यय्न्यागू करोड सङ्कलन याःगु लासिवां जानकारी बियादिल । पर्यटन दँया न्हापांगु दिं म्हिगः ख्वप नगरपालिकां ख्वप दुहाँ वःपिं गुम्ह पर्यटकतय्त भादगाउँले तपुलि लुमन्ति चिं कथं देछागु खः । प्रचार प्रसार यायेत दत्तात्रय दरबारपाखें पिहाँवःगु र्‍याली नगरया थीथी क्षेत्र जुयाः दरबार क्षेत्रय् वयाः क्वचाःगु खः । र्‍यालीलिपा दरबार क्षेत्रय् ख्वपया ऐतिहासिक प्याखं क्यनेगु ज्या नापं जूगु खः । ताःहाकःगु दबुलिइ जिल्लाया उत्पादन प्रदर्शन याःगु खः । दरबार क्षेत्रया काउन्टरय् पर्यटन सूचना केन्द्रया म्हिगः हे नेपाल मजदुर किसान पार्टीया नायः नारायणमान बिजुक्छेँ उलेज्या यानादीगु खः ।
सूचना केन्द्रय् पर्यटकतय्गु नितिं ख्वप नगरया फुक्क सूचना उपलब्ध याइगु पूर्व नगर प्रमुख प्रेम सुवालं जानकारी बियादीगु खः । केन्द्रं निःशुल्क इन्टरनेट सुविधा उपलब्ध नापं याकेगु ज्या जूगु खः ।

More Stories Like this