१० लाखम्ह पर्यटकत दुकायेगु ग्वसाः पर्यटन वर्ष २०११
पर्यटकया नितिं नापनापं धैगु मू नारा थ्वयेका म्हिगः शनिवाःनिसें नेपाल पयर्टन वर्ष २०११ शुरु जूगु दु । थुगुसी पर्यटन वर्षय् मुक्कं यानाः १० लाखम्ह पर्यटकत नेपालय् दुकायेगु आज्जु तयाः अथे पर्यटन वर्ष न्यायेकूगु खः । पर्यटन वर्षया औपचारिक उलेज्या धाःसा थ्व हे पुस ३० गते जक जुइ । सार्क राष्ट्रया पर्यटनमन्त्रीत नापं सहभागी जुइगु उगु ज्याझ्वः दशरथ रंगशालाय् जुइ धाःगु दु । पर्यटन वर्ष मूल समारोह समितिया कजि योगन्द्र शाक्य खः । पर्यटन वर्षया अवसरय् म्हिगः त्रिभूवन अन्तर्राष्ट्रिय विमानस्थलय् न्हापां कुहांवःपिं २० म्ह विदेशी पर्यटकतय्त सरकारं विशेष लसकुस यानाः हनेज्या याःगु खः । विदेशी पर्यटकतय्त त्रिभूवन अन्तर्राष्ट्रिय विमानस्थलं इमित होटलय् तकं यंकेगु यानाः लसकुस नापं छन्हुया नयेगु व्यवस्था तकं निशुल्क याःगु खः । सरकारं पर्यटन वर्षय् भारतं २ लाख ६५ हजार, चीनं १ लाख व मेमेगु मुलुकं नापं यानाः १० लाखम्ह पर्यटकत दुकायेगु आज्जु तःगु खः ।
एकीकृत माओवादीया तत्कालिन सरकारं सन् २०११ यात पर्यटन वर्षया रुपय् हनेगु धकाः निर्णय याःगु खः । पर्यटन व्यवसाययात आर्थिक विकासया महत्वपूर्णगु आधार कथं नालातःगु दु । नेपाल पर्यटन वर्ष २०११ या नितिं सरकारं २३ करोड तका ध्यबा फ्यानातःगु दु ।
