सरकार हवाई माफियाया पक्षय्

आखिर ताःहाकःगु रशाकसीलिपा नेपाल वायुसेवा निगमया कार्यकारी अध्यक्ष सुगतरत्न कंसाकारं अख्तियारविरुद्ध सर्वोच्च अदालतय् रिट दायर याःगु दु । आयुक्त विहीन अख्तियारं सचिव मार्फत मुद्दा चलय् यायेमफैगु दाबी सहित कार्यकारी अध्यक्ष कंसाकारं वंगु शुक्रवाः अथे रिट तयादीगु खः । वय्कः लिसे खुम्ह पदाधिकारीपिंसं रिट तयादीगु खः ।
नेपाल वायुसेवा निगमयाके तग्वःगु जहाज धयागु हे मदुगु कारणं निगम दँय्दँसं घाटाय् वनाच्वंगु दु । उगु घाटा पनाः निगमयात नाफामूलक संस्थाया रुपय् विकास यानायंकेगु उद्देश्यं निगः जहाज न्यायेत आन्तरिक व्यवस्था मिलय् यानाः न्यायेगु प्रक्रियाय् वंगु खः । तर थनया राजनीतिक पार्टी व नेतातय्गु छत्रछाँयाय् च्वनाच्वंपिं भ्रष्ट व नैतिकरुपं पतित हवाइ माफियात थुकिया नितिं तयार मदु व निगमयात न्ह्यात्थे यानाः नं विमान विहीन यानातयेगु व थुयालिपा विघटन याकेगु प्रक्रियाय् न्ह्याः वनेत स्वयाच्वंगु खः । निगमयात विघटनं बचय् यायेगु धयागु जहाज न्यायेगु हे खः । विना जहाज निगम विघटन जुइगु निश्चित खः । नेपालय् मेहनत व इमान्दारीं कमय् यायेगु स्वयाः चांचां धनी जुइत स्वइपिनिगु ल्याः अप्रत्यासितरुपं अप्वयाः वःगु दु । टेण्डरया पेशां निसें जग्गा जमिन न्यायेमीगु ज्याय् थुज्वःपिं मनूत न्ह्यःने वयाच्वंगु प्रष्ट सीदु । थुमित भूमाफिया, जल माफिया, हवाई माफिया आदि इत्यादी धाइ । थुमिसं नाफा कमय् यायेत हरेककथंया माध्यमत छ्यलेगु यानावयाच्वंगु दु । संसदीय दलतय्गु संरक्षणय् विकास जुयाच्वंगु खँ नं सनां मस्यूगु, मखंगु खइमखु । थुकी गैरकानूनी ज्यांनिसें हरेककथंया अपराधिक क्रियाकलाप यायेत नं थुपिं ल्यूनेलानाच्वंगु मदु ।

नेपाःया हवाई उडान आन्तरिक व बाह्य यानाः निगूकथंया हवाई उडान जुयावयाच्वंगु दु । नेपाल वायु सेवा निगमं आन्तरिक उडान याके चाहे जूसा बाह्य उडान दक्को प्राइभेट व विदेशी व्यापारिक कम्पनीतय्सं हालीमुहाली यानावयाच्वंगु दु । आन्तरिक जक उडानं निगमया अवस्था बांमलाइगु व विना जहाज निगम विघटनय् वनीगु निश्चित जूगुलिं हे निगमया कार्यकारी अध्यक्ष लगायत अनया सकल पदाधिकारी कर्मचारीतय्सं सहलह ब्याकाः निगमं निगः जहाज न्यायेगु प्रक्रियाय् दुहांवंगु खः । प्रक्रिया न्ह्याकेवं सरकारं नं जमानी च्वनाबीगु खँ आ.ब. २०६५/६६ या बजेटय् स्पष्ट न्ह्यथंगु खः । निगमया सञ्चालक समितिया निर्णयकथं ग्लोबल टेण्डर बियाः जहाज न्यायेगु प्रक्रिया न्ह्याकाः ५ करोड ७३ लाख धेबा कम्पनीया नितिं छ्वयाः नं ब्यूगु खः । तर थ्व खँ हवाई माफिया व सरकारय् च्वनाच्वंपिं भ्रष्ट व कमिशन खोरतय्त पचय् मजुल व भ्रष्टाचार जूगु खँ पितहयाः आधारहीनरुपं गलत जूगु प्रचारय् हयाः निगमया पक्षय् ज्या याइपिं राष्ट्रसेवकतय्त बदनाम यायेगु षड्यन्त्र शुरु जुल ।
विमान न्यायेत सञ्चालक समितिया निर्णय व सरकारया स्वीकृति दयेवं गाः । तर थन कमिशन नयाः ल्होंपिं हवाई माफियातय्सं संसदीय राजनीतिक दलतय्गु लिधँसा कयाः वैना छ्वःगु धेबाय् भ्रष्टाचार जुल धकाः ध्वाँग पुयाः लेखासमिति व अख्तियारयात घ्वानाः विनाकारण मुद्दा तयाः राष्ट्रसेवकपिंत बदनाम व दुःख बीगु ज्यायात । थ्व सरासर गलत व अपराधिक मानसिकतां प्रेरित खनेदु । अख्तियारं गुगुयात बैना धकाः धयावयाच्वंगु व यथार्थय् वैना मखुसे एयरबश सम्बन्धी विवरण कायेत माःगु सामान्य शुल्क जक खः । विना आधार, सुनां माग यायेगु तं एयरबशं सुइतं नं विवरण छ्वइगु इमि चलन मदु । थुगु पृष्ठभूमिइ स्वीकृति विना बैना छ्वल धायेगु अनुचित खः ।

More Stories Like this