माओवादी जूगुलिं गाडीया सुविधा कायेमखंम्ह दिपक
ब्वसिगां (झीगु स्वनिगः)
येँया दक्षिण पश्चिम लागाया बक्सिङ खेलाडी दिपक महर्जन एकीकृत माओवादीया कार्यकर्ता धकाः संचार माध्यमय् वयेवं वय्कलं गाडीया सुविधा याये मखन । बक्सिङ कासाय् दक्ले उत्कृष्ट जूपिं कासामिपिन्त न्हापा न्हापा किया गाडी बियाः वयाच्वंगु खःसा थुगुसी वय्कः दिपक महर्जन माओवादीया कार्यकर्ता जूगुलिं धकाः बक्सिङ महासंघया महासचिवं अथे गाडीया सुविधा मवःगु खः धकाः धयादीगु सूत्रं धाःगु दु ।
ब्वसिगांया दिपक महर्जनं वंगु छुं दिं न्ह्यः जक चीनय् जूगु एसियाली कासाय् बक्सिङपाखे काँश्य पदक त्याकूगु खः । उगु कासाय् नेपाःमि कासामित मध्ये वय्कः महर्जन छम्हेस्यां जक पदक त्याकाः नेपाःया न्हाय् तःगु खः । कासाया ख्यलय् नं अथे राजनीतिक पूर्वाग्रह तयाः कासामियात सुविधा बिइगुलिइ तकं बन्चित याःगुलिं स्वयं कासाख्यःया मनूत हे अजू चाःगु दु ।
