सहमतिया लँपु मज्वन धाःसा जनतां धिक्कार याइ सभामुख
यल (झीगु स्वनिगः)
संविधानसभाया नायः नापं व्यवस्थापिका संसदया सभामुख सुवासचन्द्र नेम्वाङं मूमू राजनीतिक दलत सहमतिया लँपुइ मवन धाःसा नेपाःमि जनतां धिक्कार याइ धकाः ख्याच्वः बियादीगु दु । यलय् जूगु ललितपुर उद्योग वाणिज्य संघया ३१ दाया मुँज्याया उलेज्या यानादिसें नेम्वाङं म्हिगः शनिवाः अथे ख्याच्वः बियादीगु खः । वय्कलं धयादिल 'मूमू दलया नेतात प्रचण्ड, रामचन्द्र पौडेल व झलनाथ खनालं सहमतिया लँपु मज्वन धाःसा जनतां धिक्कार याइ ।'
सभामुख नेम्वाङं पुस २५ गतेनिसें जुइगु संसदया नियमित अधिवेशनं राजनीतिक निकास बिइ धकाः आम जनतायात आश्वस्त यायेत तकं दलतय्त इनाप यानादिल । सभामुख सुवासचन्द्र नेम्वाङ्गं जनताया बलं वःगु संघीय लोकतान्त्रिक गणतान्त्रिक नेपाः दुनेया फुक्क कथंया जाति, भाषा, संस्कृति व धर्मया मंकाः क्यबया रुपय् तयार यायेत दलतय्गु दथुइ सहमति माः धकाः नं धयादिल ।
सभामुख नेम्वाङं नेपालय् शान्ति प्रक्रियाया नितिं महत्वपूर्णगु भूमिका म्हिताः वयाच्वंगु राष्ट्रसंघीय मिसन अनमिन लिहां वने न्ह्यः हे दलतय्गु दथुइ सहमति जुयाः राजनीतिक निकास बिइमाः धयादिल । ज्याझ्वलय् नेपाल उद्योग वाणिज्य महासंघया न्वकु कृष्ण ताम्रकारं सन् २०१० व्यापारीया नितिं हाकूगु दँ जुयाः फुनावन धयादिल ।
