नेपालमण्डल डटकम व सिन्ह:स्वां खल:यात शंखधर सिरपा

नेपाल संवत् ११३० व ११३१या शंखधर सिरपा सिन्ह:स्वां खल: व नेपालमण्डल डटकमयात लःल्हाःगु दु ।

नेपाल संवत् व शंखधर साख्वा:या प्रचार प्रसारय् विशिष्ट योगदान याःगु संचार माध्यम, सामाजिक संस्था व व्यक्तियात बीगु यानाः वयाच्वंगु थुगु सिरपा थौं छगू ज्याझ्वःया दथुइ सिन्ह:स्वाँ खल व नेपालमण्डल डटकमयात लःल्हाःगु खः ।

नगदेशया श्रीगणेश मा.वि.इ जूगु ज्याझ्वलय् समितिया नायः पद्मरत्न तुलाधरं सिन्ह:स्वाँ खलःया संरक्षक मनोज नेवाः व नेपालमण्डल डटकमया जुजुमान महर्जनयात सिजःपौ नापं छसिकथं झिंछद्वः व स्वीतकाः व झिंछद्वः व स्वीछतकाः दां लःल्हानादीगु खः ।

ज्याझ्वलय् समितिया नायः तुलाधरं करुणादेवी समारक धर्माथ गुथिया पिथनाय् च्वमि दया शाक्यं च्वयादीगु 'नेवाः भाय् लर्नस' सफूया उलेज्या यानादीगु खःसा वय्कलं हे नेवारस् इन सिक्किम (http://www.newarsinsikkim.org) नांया बेव साइट नं लञ्च यानादीगु खः । ज्याझ्वलय् सिक्किम सरकारया संस्कृति तथा धरोहर विभागया पुलांम्ह छ्याञ्जे राजीव शंकर श्रेष्ठया नं उपस्थिति दुगु खः ।

समितिया नायः तुलाधरया सभापतित्वय् जूगु ज्याझ्वलय् मूपाहाँ नापं इतिहासविद् जगदीशचन्द्र रेग्मी व छत्रबहादुर कायष्ठं नेपाल संवतया महत्वया बारे चर्चा यानादीगु खःसा नेवाः देय् दबूया संरक्षक लक्ष्मण राजवंशी व समितिया दुजः डा. पुष्पराज राजकर्णिकारं नं थःथःगु नुगः खँ प्वंकादीगु खः ।

समितिया छ्याञ्जे गणेशराम लाछिं लसकुस यानादीगु ज्याझ्वलय् शंखधर सिरपा काःगु संस्थाया मनोज नेवाः व जुजुमान महर्जनं नं न्ववानादीगु खः । शंखधर सिरपाया दाता कैलाशभक्त प्रधानाङ्गं सुभाय् देछानादीगु ज्याझ्व: समितिया दुज: शरद कसा:जुं न्ह्याकदिगु खः ।

More Stories Like this