मुनपाखें हाकनं द्वन्द्व जुइगु चेतावनी

राजनीतिक अस्थिरतां नेपाःया शान्ति प्रक्रियाय् संकट

येँ (सन्ध्या टाइम्स)/संयुक्त राष्ट्रसंघया महासचिव वान की मुनं नेपालय् शान्ति प्रक्रिया गम्भीर मोडय् थ्यंगुलिं दलतय्गु दथुइ समझदारी मजुल धाःसा मेगु द्वन्द्व ब्वलनीगु ख्याच्वः बियादीगु दु। राष्ट्रसंघीय शान्ति मिसन अनमिनया म्याद फुइत्यंगु अवस्थाय् दलतय्गु समझदारी जुइ मफयाः थ्यंमथ्यं १९ हजार माओवादी लडाकु समायोजन यायेगु हाथ्या ब्वलंगु दु धकाः नं धयादिल ।

वंगु चान्हय् राष्ट्रसंघीय सुरक्षा परिषदय् पेश यानादीगु नेपाल सम्बन्धि प्रतिवेदनय् वान कि मुनं दलया स्वार्थ व असहमतियात अथें त्वःताः माओवादी सेनाया समायोजन व पुनःस्थापनया ज्या तीब्र रुपं न्ह्यब्वाकेत नेपाःया राजनीतिक दलतय्त इनाप यानादीगु दु। अनमिन लिहां वने धुंकाः खाली जूगु अवस्था वयेफइगु व उगु इलय् सेना समायोजन नापं मेेमेगु विषय क्वःछीत थाकुइगु जूगुलिं अनमिनया म्याद क्वमचाःनिगु इलय् हे उज्वःगु विषयसं सहमति ब्वलंकाः टुंगे यायेमाः धकाः वय्कलं बः बियादीगु दु। वानं थःगु प्रतिवेदनय् चेतावनी बियादिसें धयादिल, 'बृहत शान्ति सम्झौताय् बचं बिउगु यक्व हे चिजत संवोधन जुइ फयाच्वंगु मदु। उकिं यानाः न्हूगु चरणया द्वन्द्वया पुसा पिना बीफु ।'

राजनीतिक दलतय्सं शान्ति प्रक्रियाया विषययात त्याःगु बूगुया विषय मदयेकुसे फुक्कसित मान्य जुइगु कथंया समझदारीइ वनेमाःगु खँय् वय्कलं बः बियादिल। दलतय्सं सेप्टेम्बरय् अनमिन लिहां वने न्ह्यः हे शान्ति प्रक्रिया पूरा यायेगु सहमति याःसां उगु ज्या पूवंकेगु ज्या मजू धयादिसें महासचिव वान कि मुनं नेपालय् राजनीतिक अस्थिरताया कारणं शान्ति प्रक्रिया तकं संकटय् लाःगु दु धकाः नं न्ह्यथनादिल ।

सन् २००७ निसें नेपाःया शान्ति प्रक्रियायात ग्वाहालि यायेगु नितिं राष्ट्रसंघीय मिसन अनमिनया ई वइगु माघ १ गते फुइत्यंगु दु ।