नेपाःया सुरक्षा सरोकारया खँ ग्व?
नेपाः-भारत दथुइ जब सुरक्षा मामिलाया खँ वइ, अन अप्वः यानाः भारतीय सुरक्षा सरोकारया खँ हे जक मू रुपं न्ह्यथनेगु याइ।आः नकतिनि हे जक नं नेपाः भ्रमण यानाः लिहां वंम्ह भारतीय सेनाया प्रधानसेनापति विजयकुमार सिंहं नं नेपाःया लँपु जुयाः भारतय् लश्कर-ए-तोएबाया लडाकुत दुहां वयाच्वन धइगु खँय् चिउताः प्वंका थकल। थ्व स्वयां न्ह्यः नं भारतं गबलें पाकिस्तानी जासूस भारत दुहां वल धकाःसा गबलें चिनियाँत भारतय् दुहां वल धकाः नेपाःया समक्ष कचकच याः वयाच्वनीगु खः। आः हानं लश्कर-ए-तोएबाया न्हूगु खँ न्ह्यःने हयाच्वंगु दु ।
वास्तवय् भारत जक मखु विश्वया छुं नं देशय् आतंकवादं दुःख बिउगु नेपाःयात मयः। तर छुं देशय् आतंकवादीतय्सं दुःख बियाच्वन धइगु खँयात कयाः नेपाःयात छुं कथंया आक्षेप लगे यायेगु नं पाय्छि धाःसा मखु। छुं नं देशं थःगु सुरक्षा यायेगु न्हापांगु दायित्व वयागु हे खः। नेपाःपाखें भारतया सुरक्षा प्रभावित जुयाच्वन धाः थें भारतपाखें नेपाःया सुरक्षा प्रभावित जुयाच्वंगु मदुला? आः नकतिनि हे नं खँ वल, नेपाःया माओवादीयात भारतया सरकारं हे तालिम बीगु जुयाच्वन। न्हापा श्रीलंकाया तामिलतय्त नं भारतं हे तालिम बिया छ्वःगु खः। आः नं नेपाःया तराईलय् सक्रिय गुलिखे सशस्त्र पुचःतय्सं भारतय् हे च्वनाः तालिम कयाच्वंगु दनि। छु थ्व नेपाःया सुरक्षा सरोकारया विषय मखु ला? भारतय् दुहां वनीपिं आतंकवादीतय्सं नेपाःया लँपु छ्यलाच्वंगु दुसा व नं नेपाःया सुरक्षा सरोकारया विषय खः। नेपाःया राजनीतिक, कुटनीतिक व सुरक्षा संयन्त्रया अधिकारीतय्सं भारत समक्ष थुपिं खँ नं ल्ह्वनेमाः। आखिर सुरक्षित ला नेपाः व नेपाःमित नं जुइमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
