ट्वान्टी - ट्वान्टी क्रिकेटय् सुदूरपश्चिम फाइनलय्

येँ (झीगु स्वनिगः)

सुदूरपश्चिम क्रिकेट विकास समिति येँय् न्ह्यानाच्वंगु मदन भण्डारी मेमोरियल ट्वान्टी - ट्वान्टी क्रिकेटया फाइनलय् दुहाँवंगु दु । त्रिवि क्रिकेट मैदानय् म्हिगः जूगु धेंधेंबल्लाः कासाय् सुदूरपश्चिमं रुद्रमति क्लबयात बुकाः फाइनलय् दुहाँवंगु खः । समूह चरणया स्वंगुलिं कासा त्याकाः ६ अंक कयाः समूह 'बी' या त्याकामि जूगु सुदुरपश्चिमं उपाधिया नितिं थौं शुक्रबाः सशस्त्र प्रहरीया एपीएफ क्लबलिसे धेंधेंबल्लाः कासा म्हिती ।

त्रिवि क्रिकेट मैदानय् टस त्याकाः व्याटिङ याःगु रुद्रमति क्लबं निर्धारित २० ओभरय् ९ विकेटया क्षतिइ १ सय १० रन दयेकूगु खः । वयागु नितिं पविन्द्र राजभण्डारीं ३५, सुरेन्द्र चन्दं १७ व विनेश भण्डारीं अविजित १२ रनया योगदान ब्यूगु खः । लिसलय् मैदानय् कुहाँवःगु सुदूरपश्चिमं १८ दशमलव ३ ओभरय् ५ विकेटया क्षतिइ १ सय ११ रन दयेकूगु खः । सुदूरपश्चिमया नितिं सन्तोष भट्टं अविजित २६ रनया योगदान ब्यूगु खःसा अथेहे प्रदीप ऐरीं १७, विनोद क्षेत्रीं अविजित १६, दिनेश ऐरीं १२ व नरेश बुढाएरं १० रन कायेत ताःलाःगु खः । रुद्रमतियात अःपुक्क हे कःघायेगु झ्वलय् प्लेयर अफ दि म्याच घोषित सुदूरपश्चिमया सन्तोष भट्ट व नरेश बुढाएरं समान ३/३ व भुवन कार्कीं २ विकेट काःगु खः ।

More Stories Like this