महाँकाल रनि· शिल्ड चेस कासा न्ह्यात

येँ (झीगु स्वनिगः)

श्री महाँकाल मा.वि. महाबौद्ध येँया ग्वसालय् स्वनिगः ब्याःगु न्याक्वःगु अन्तर माविस्तरीय महाँकाल रनिङ्ग शिल्ड चेस धेंधेंबल्लाः कासा म्हिगःनिसें उगु ब्वनेकुथिइ न्ह्याःगु दु । स्वन्हुयंकं न्ह्याइगु उगु कासाया उलेज्या नेपाल बुद्धिचाल संघया नायः राजेशहरि जोशीं यानादिसें पुरस्कृत जुइपिं १२ म्ह कासामिपिनिगु नितिं अन्तर्राष्ट्रिय स्तरया चेस बोर्ड छपाः छपाःव गोली छगू छगू सेट सिरपाःकथं तनाबीगु बचं नं बियादिल । येँ, यल व ख्वपया २७ गू ब्वनेकुथिया ६६ म्ह कासामिपिंसं ब्वति कयाच्वंगु उगु कासाया उलेज्याझ्वः श्री महाँकाल माविया मू स्यनामि सन मानन्धरया सभानायःसुइ, लसकुस न्वचु कासाया कजि स्यनामि हरिकृष्ण महर्जन व ज्याझ्वः ल्यू मू स्यनामि उषा मालाकारं न्ह्याकादीगु खः ।

कासाय् न्हाप लाःम्हेसित रनिङ्ग शिल्ड दाँ २५००/- ट्रफि, ल्यू लाःम्हेसित ट्रफि व दाँ १५००/- व लियांल्यू लाःम्हेसित ट्रफि व दाँ १०००/- तका, अनं झिगूगु थासय् तक्क लाःपिं व बेष्ट लेडि व वेष्ट जुनियरय् ताःलाकेफूपिंत ट्रफि अलय् ब्वति काःपिं सकसितं दसिपौ बीगु जूगु दु । न्हापांगु कासाय् निगू ल्या कयाः न्ह्यःने वयेत ताःलाःपिं कासामिपिं छसिकथं श्री महाँकाल माविया विवेक लामा व अरुण घिसिङ्ग, अन्नपूर्णया विजय डंगोल व रोशन पौडेल, सत्य साई शिक्षा सदनया श्रेया मानन्धर, सरस्वती टोखाया धनकाजी व रोहन डंगोल, काठमाडौं मोडेलया उमेश राणा, शहीद शुक्रया गोविन्द अधिकारी, नेक्स जेनेरेशनया विवेश खड्का, त्यौडया दिपेन्द्र, नर्थ प्वाइन्टया गृष्मान गौतम, खोपि्रङ्ग ख्वपया राज प्रजापति व विकेश लाखेपिं खः ।

More Stories Like this