द्वन्द्वकालया मुद्दा मथनेत ख्याच्वः

येँ (झीगु स्वनिगः)

एकीकृत नेकपा माओवादीं राजनैतिक प्रतिशोधया आधारय् द्वन्द्वकालया मुद्दा मथनेत सरकारया ध्यानाकर्षण याकूगु दु । माओवादी छ्याञ्जे लिसे पूर्वाञ्चलव्यूरो इन्चार्ज सिपी गजुरेल 'गौरवं' पार्टी केन्द्रीय ज्याकू पेरिसडाँडाय् म्हिगः पत्रकार सम्मेलनया ग्वसाः ग्वयाः कामचलाउ सरकारं न्हापा सहमति जुइधुंकूगु राजनीतिक मुद्दा शान्ति सम्झौता व अन्तरिम संविधान अःखः थनेत स्वःगुलिं देय्यात हाकनं गृहयुद्धय् घ्वायेगु षड्यन्त्र न्ह्याःगु जकं मखुला धइगु न्ह्यसः ब्वलंगु धयादीगु दु । राज्यपक्षं द्वन्द्वकालया मखुगु मुद्दा थनाः थः नेता कार्यकर्ताविरुद्ध कारबाही प्रक्रिया न्ह्यःने न्ह्याकूगुलिं च्यूताः प्वंकादिसें माओवादीं ओखलढुङ्गा क्षेत्र ल्याः २ या सभासद् बालकृष्ण ढुङ्गेलयात न्यायीक जानकारी ग्रहण मयासे सर्बोच्च अदालतं त्रुटिपूर्ण फैसला याःगु जानकारी नापं बियादीगु खः ।

छुं ई न्ह्यः जिल्ला अदालत ओखलढुङ्गां निम्ह सभासद्लिसे न्यय्खुम्हविरुद्ध वारेन्ट पिथनाः ज्वनेगु उजं पिकाःगुलिं माओवादीं तं प्वंकूगु खः । द्वन्द्वकालय् माओवादी नेता कार्यकर्ताविरुद्ध राज्यपक्षं मखुगु मुद्दा दायर याःगु खः ।छ्याञ्जे गजुरेलं सरकारं मुद्दा लित मकाःसा सशक्त आन्दोनल यानाः सरकारयात बाध्य याइगु नापं जानकारी बियादीगु दु । विस्तृत शान्ति सम्झौताया दफा ५,२,७ य् निगुलिं पक्षं थीथी मनूतय्त राजनैतिक हुनिं ब्यूगु द्वपं, दाबी, उजुरी व विचाराधिन दुगु मुद्दा मामिला लित कायेत व थुनाय् तयातःपिं बन्दीतय्गु स्थिति याकनं हे सार्बजनिक यानाः याकनं त्वःतकेगु न्ह्यथनातःगु दु ।