थँबहिइ पर्यटकतय् नितिं विशेष व्यवस्था

<येँ> (झीगु स्वनिगः)

ठमेल पर्यटन बोर्ड विकास समितिया बैठक हालै च्वंगु दु । स्थानीय चाक्सी थि्र डि रेष्टुरेण्टय् च्वंगु उगु बैठकं पर्यटन दँ २०११ यात ताःलाकेत थीथी ज्याझ्वः यायेगु क्वःछ्यूगु दु । छलफलय् ब्वति कयादीपिं २९ वडाया सचिव, दरबार क्षेत्रया प्रहरी निरिक्षक, विकास समितिया दुजः प्रकाश जङ्ग राणा लगायत व्यक्तिपिंसं थीथी सुझावत बियादीगु खः ।

थँबहि पर्यटन विकास समितिइ स्थानीय क्लब, सामुदायिक प्रहरी, सोर्‍हखुट्टे वडा प्रहरी, नाट्यश्वरी टोल सुधार समिति, हृप्चेश्वरी दोभान उपभोक्ता समिति, न्हूगु पार्क, लैंनचौर युवा क्लब, महानगर प्रहरी, ठमेल टुरिष्ट व्यवसायी, होटल व्यवसायी, रेष्टुटेण्ट व्यवसायीत दुथ्यानाच्वंगु दु । छलफलया झ्वलय् निम्नकथंया व्यवस्थापन यायेगु नं क्वःछ्यूगु दु । फोहर मुनेत डसबिनया व्यवस्था यानाः त्वाःया थाय् थासय् तयेगु सीसी टिभी तयेगु, ट्राफिक व्यवस्था सुथां लाकेगु, पेटीं पिकयाः तयातःगु पसःत चीकेगु, सतक बालबालिका अनं स्थानान्तर यायेगु, सतक मत व्यवस्थित यायेगु लगायत वःगु सुझावत कार्यान्वयन यानाः यंकेगु नं समितिं क्वःछ्यूगु दु । हाल थँबहि लागाय् ९०० खात छेँत दु । होटल, रेष्टुरेण्ट व पर्यटन नाप सम्बन्धीत ३६०० व्यवसायत ३०,००० मजदुरतय्सं ज्या याना वयाच्वंगु दु । सीसी टिभी तयाः उगु लागाय् ट्राफिक व अपराधिक समस्यायात व्यवस्थित यायेफूगुलि, थुकिं फाइदा हे ब्यूगु महशुस जूगु दु ।

हालै तिनि छम्ह विदेशी पर्यटकतयागु ट्याक्सी गःबलय् ल्याबटप व सुटकेश त्वह फिल - उगु सीसी टिभीं यानाः तत्काल हे पत्ता लगय् जुल व उम्ह पर्यटकं तंकेधुंकूगु सामान लुयाः दंगदास जुल । ट्राफिक व्यवस्थाया नितिं १० म्ह ट्राफिक प्रहरीत खटय् याःगु दु । थुकिं यानाः उगु लागा हाल ट्राफिक समस्यां मुक्त हे खनेदु । उगु पर्यटन बोर्ड विकास समितिया ग्वसालय् पर्यटन दँ २०११ ताःलाकेगुया नापनापं नमुना पर्यटन क्षेत्रकथं विकास यायेगु कुतः ताःलाइगु हे खनेदु ।

More Stories Like this