ज्ञानया अभावय् द्वलंद्वः मूया कस्ति सितिंवन

बागलुङ (झीगु स्वनिगः)

आवश्यक ज्ञानया अभावय् थनया कृषकतय्सं उत्पादन याःगु द्वलंद्वः मूया कस्ति अथेहें सितिं वनाच्वंगु दु । जिल्लाया पश्चिमवर्ती सुखौरा गां विकास समितिया कृषकत मनग्य आम्दानी जुइगु बहुउपयोगी कस्तिया उचित व्यवस्थापन यायेमफयाः दच्छिया द्वलंद्वः मू बराबरया कस्ति अथेहें वांछ्वयेत बाध्य जूगु खः । परम्परागत खोप्पा लिसे मुढेघारय् हा लहीना वयाच्वंपिं सुखौराया कृषकतय्सं घार व्यवस्थापन, कस्ति कायेगु तरिका, हाया चरन व्यवस्था, दानापानी, तापक्रमया सन्तुलन, कस्ति प्रशोधन लगायतया प्राविधिक ज्ञानया कमिं यानाः कस्तिया सही सदुपयोग यायेफूगु मदु ।

हा चरनया नितिं प्रशस्त वन दुगु सुखौराय् आपालं स्थानीयया छेँय् न्यागू/न्हय्गू घार हा दुसां नं आःतक्क सुनां नं कस्ति मम्यूगु स्थानीयबासीं धाःगु दु । 'छेँय् न्हय्गू घार हा दयाः छुं यायेगु छतका धेबा धकाः आम्दानी मदु' - सुखौरा - ४ माझगांया बलबहादुर पुर्जां धयादिल - 'माःगु शीप मदयाः छगू पोलाया कस्ति कायेबलय् निगू पोला सितिं वनी अले गुकथं आम्दानी जुइफइ ?' खोप्पा लिसे मुढेघारय् पुलांगु शैलीपाखें कस्ति कायेबलय् हा सीगु यानाच्वंगु पुर्जां धयादिल । अपुक्क हे बांलाक्क आम्दानी जुइगु हाया उचित व्यवस्थापन मजूगु धासें स्थानीय देवबहादुर बोहरा आधुनिक घार लिसे प्राविधिक तालिम ब्यूसा सुखौरायात कस्ति उत्पादनया पकेट क्षेत्र दयेके फइगु धयादिल ।
कस्ति उत्पादनया नितिं बांलाःगु सम्भावना क्वबुयाच्वंगु सुखौराय् कृषि ज्याकुथिं थुगु सम्बन्धी छु नं ज्याझ्वः सञ्चानल मयाःगु सुखौरा - ४ या बलबहादुर थापां धयादिल ।

More Stories Like this