तमू ल्होछारय् शान्ति व समावेशी संविधान

- पारुल -

"फुक्क तमूतय्गु साझा धारणा, तमुवान राज्यसहितया शान्ति व समावेशी संविधान झीगु चाहना" धइगु मू नारा ज्वनाः गुरुङ -तमू समुदायं थःगु मू नखः तमू ल्होछार म्हिगः थीथी ज्याझ्वः यानाः हंगु दु । गुरुङ -तमू) समुदायं थःगु मू सांस्कृतिक नखः बाघ वर्गयात विदाई यासें हि ल्हो -भौंचा वर्ग) यात लसकुस यासें थुगु नखः हंगु खः । फुक्क तमू समुदायं इलय् हे संविधान दयेका जातीय, भाषा, भूगोलया आधारय् आत्मनिर्णयया अधिकारनापं संघीय लोकतान्त्रिक गणतन्त्रया पलिस्थाय् बहः ब्यूगु खनेदु ।

प्रगतिशिलताय् न्ह्योने यंकेगु कुतः यासें याःगु ल्होछार तमूतय्सं मू नखः जक मधासें देशय् जुयाच्वंगु समस्यायात सम्बोधन यासें सघीय गणतन्त्रयात नं ब्यूगु दु । गुरुङ समुदायं पुस १३ गतेनिसें प्यन्हु तकं तःजिक्क हनीगु नं क्वछिना तःगु खः ।
म्हिगः ल्होछार नखः हनीगु लसताय् फुक्क नेपालीया सुख, शान्तिया मनंतुसें बसन्तपुलीं र्‍याली न्ह्याःगु खः । तमू मूल आयोजक समिति- २०६७ या ग्वसालय् जूगु उगू र्‍याली वसन्तपुर, न्यूरोड, जमः, घण्टाघर, रत्नपार्क, भद्रकाली, सहिदगेट जुया तिंखेलय् ज्याझ्वः जूगु खः । थीथी झाँकी, बाजं नापं पिकाःगु उगु र्‍यालीइ गुरुङ जातिया म्हसीका दइगु प्राचीन भेषभूषा, संस्कृति, पहिचान सहितया विषयवस्तु नं दुथ्याकाः तःगु खः ।

र्‍यालीइ गुरुङ राष्ट्रिय परिषद्लगायत मेमेगु गुरुङ जातिया संघसंस्था नापं लामा धर्मगुरु, थीथी राजनीतिक दलया नेता, बुद्धिजीवी, कलाकार, संस्कृतिविद्पिंस ब्वति काःगु खः । र्‍याली लिपा स्वनिगलय् जूगु ल्होछार पर्वया ज्याझ्वलय् संविधानसभाया अध्यक्ष सुवास नेम्वाङं उलेज्या यानादीगु खः । वयकलं हिमाल, पहाड, तराईया फुक्क जनतां एकतां जक दयेत फुक्क जाति, भाषा व धर्मया साझा फूलवारी दयेकी फइगु धापू तयादिल । अथेहे, ग्वसाः खलःया कजि देवी गुरुङं ल्होछार पर्व गुरुङतय्सं प्राचीन नखः जूगु जुसां उकिंया वैज्ञानिक महत्वं जाःगुलिं फुक्क जाति व समुदायया सास्कृतिया कथं विकास यानाः यंकेमाःगु धयादिल । उगु ज्याझ्वलय् स्वनिगः दुने च्वंपिं गुरुङ समुदायं तिंख्यः दुने प्याखँ, त्वनेगु लः, नसाःया ब्यवस्था याःगु खः ।

More Stories Like this