प्रमपाखें सुतुक्क महाद्यःया दर्शन
येँ (झीगु स्वनिगः)
कामचलाउ प्रधानमन्त्री माधवकुमार नेपाल सुतुक्क विश्वया हे दकले तःजाःगु शिवया मूर्ति धकाः नालातःगु सांगाया चित्तपोलय् वनाः महाद्यःया मूर्ति दर्शन यानादीगु दु । वय्कः म्हिगः विहिवाः साढे १ बजे अथे शिवया मूर्ति दर्शन यायेत अन थ्यंगु खः । अन प्रधानमन्त्री नेपाल वइगु धकाः सुना नं मस्यू । संचारकर्मीतय्सं नं मसिइक वय्कलं अन दुगु प्राकृतिक चिकित्सालय नं अवलोकन यानादीगु खः । सुना नं मसिइक १०८ मिटर तःधिकःगु शिवया उगु मूर्ति दर्शन यानाः लिहांवःगु खः ।
थ्वसिबें न्ह्यः कामचलाउ सरकारया हे परराष्ट्रमन्त्री सुजाता कोइराला, उपप्रधानमन्त्री विजयकुमार गच्छेदार, नापं मेमेपिं मन्त्रीतय्सं तकं उगु मूर्तिया दर्शन यानादी धुंकूगु दु ।
