शीर्ष नेतात थक्वाः—नगरकोट र्यालीइ
येँ (झीगु स्वनिगः)
नेपाल पर्यटन वर्ष २०११ या पूर्वसन्ध्याय् येाया थक्वाःतंनिसेंं नगरकोट तक जूगु मोटरसाइकल र्यालीइ राजनीतिक दलया शीर्ष नेतात नं सहभागी जुयादिल । म्हिगः विहिवाः नेपाल पर्यटन बोर्ड व थीथी सामाजिक संघ संस्थातपाखें ग्वसाःग्वःगु उगु मोटरसाइकल र्याली थक्वातय् संविधानसभाया दक्ले तःधंगु दल एकीकृत नेकपा -माओवादी)या नायः पुष्पकमल दाहाल प्रचण्ड व संविधानसभाया नायः सुवास चन्द्र नेम्वाङ. मंकाः कथं न्ह्याकादीगु खः ।
राष्ट्रिय सहमतिया आधारय् मुलुकय् दिगो शान्ति स्थापना व न्हूगु संविधान च्वयेगु नितिं दलत सहमतिया आधारय् न्ह्याः वनेमाः धकाः दबाब बिइगु नं आज्जु तयाः अथे म्हिगः मोटरसाइकल र्याली याःगु खःसा उगु र्यालीइ मूमू राजनीतिक दलया शीर्ष नेतातय्सं ब्वति कयादीगु खः । उगु मोटरसाइकल र्याली नेपाल पर्यटन वर्ष २०११ सफल यायेगु नितिं याःगु जुयाः नेतातय्सं नेपालय् विदेशी पर्यटकत दुथ्याकेगु नितिं जुइगु थुगु ज्याझ्वलय् ग्वहालि यायेगु जुइ धकाः धयादीगु दु ।
उगु मोटरसाइकल र्यालीयात येाया कलंकिइ नेपाली कांग्रेसया सभापति सुशील कोइराला नापं महामन्त्री प्रकाशमान श्रेष्ठं लसकुस यानादीगु खः । अथे हे यलया ज्यावला ख्यलय् नागरिक समाजया न्ह्यलुवात डा. देवेन्द्रराज पाण्डे, पद्मरत्न तुलाधर, कृष्ण पहाडी, श्याम श्रेष्ठ नापं मेमेपिन्सं लसकुस यानादीगु खः । अथे हे न्हूबानेश्वरय् एमालेया नायः झलनाथ खनाल, नेपाल कम्युनिष्ट पार्टीया संस्थापक नरबहादुर कर्माचार्य नापं मेमेपिन्सं अथे हे कोटेश्वरय् मधेशी जनअधिकार फोरमया नायः उपेन्द्र यादव अले ख्वपय् नेपाल मजदुर किसान पार्टीया नायः नारायणमान विजुच्छें लसकुस यानादीगु खः ।
