पाटन क्याम्पसय् एमाले अखिलय् ल्वापु
येँ (झीगु स्वनिगः)
वर्तमान सरकारया नेतृत्व यानाच्वंगु नेकपा -एमाले)या भ्रातृ संगठन अनेरास्ववियूया कार्यकर्तातय् दथुइ ल्वापु झन झन तच्वयाः वःगु दु । एमालेया नायः झलनाथ खनाल व वरिष्ठ नेता केपि शर्मा ओली पक्षधरया कार्यकर्तातय् दथुइ ल्वापु जुयाः संस्थापन पक्षया निम्ह कार्यकर्तात घाःपाः जूगु दु । एमाले अखिलया नायः माधव ढुंगेल पक्षधरं यलया पाटन क्याम्पसय् एमालेया संस्थापन पक्षया दथुइ ल्हाःवानाः ल्वापु जूगु दु । म्हिगः विहिवाः उद्घोषण तालिमया उद्घाटन सत्रय् केन्द्रीय दुजः दिलिप लामायात अतिथि मदयेकल धकाः ढुंगेल पक्षधरं ज्याझ्वः क्वचाये धुनेवं हे संस्थापन पक्षया सुरेश ढकाल व गोविन्द श्रेष्ठयात आक्रमण याःगु खः ।
अथे आक्रमण यानाः ढकाल व श्रेष्ठयात छ्यनय् घाः जूगु खः । पाटन क्याम्पसया इकाई नायः ल्ययेगु विषयसं संस्थापन पक्ष व ओली पक्षया दथुइ विवाद सुरु जूगु खः । छुं दिं न्ह्यः जक एमाले अखिलया केन्द्रीय नेतातय्गु दथुइ तच्वकं ल्वापु जूगु खः ।
