विकिलिक्स सूचनाय् सहलह

लश्कर-ए-तोएबा बारे निम्ह सेनापति दथुइ खँल्हाबल्हा

येँ (सन्ध्या टाइम्स)/विश्वय् तहल्का मच्चे यानाच्वंगु विकिलिक्सं आः तक नेपाःया बारे छुं न्हूगु खँ ला पित हःगु मदुनि। तर वहे विकिलिक्सय् उल्लेख जुयाच्वंगु छता खँयात कयाः नेपाः व भारतीय सेनाया प्रधानसेनापतितय् दथुइ धाःसा गम्भीरतापूर्वक खँल्हाबल्हा जूगु खँ सीदुगु दु।
उकुन्हु तिनि स्वन्हुया लागिं नेपाः भ्रमणय् झाःम्ह भारतीय सेनाया प्रधान सेनापति विजयकुमार सिंहं नेपाःया लँ जुयाः लश्कर�ए�तोएबा नांगु अन्तर्राष्ट्रिय आतंकवादी संगठनया गुरिल्लात भारतय् दुहां वयाच्वन धकाः पिहां वःगु विषययात कयाः नेपाःया प्रधानसेनापति छत्रमान गुरुङलिसे खँल्हाबल्हा यानादीगु खँ विशेष सूत्रं धागु दु ।

लुमंकेबहः जू, भारतया पुलांम्ह रक्षामन्त्री ए.के. एन्थोनी व पुलांम्ह प्रधानसेनापति दिपक कपुरं अमेरिकी सुरक्षा सल्लाहकार जेम्स जोन्सलिसे नेपाःया लँपु जुयाः लश्कर-ए-तोएबाया लडाकुत भारतय् दुहां वयाच्वन धइगु बारे खँल्हाबल्हा यात धकाः विकिलिन्सं सूचना सार्वजनिक याःगु खः। उगु सूचनायात कयाः नेपाःया सुरक्षा संयन्त्रय् विशेष चिउताः तयाः खँ ल्हायेगु ज्या नं जूगु खः ।

आः नकतिनि नेपाः भ्रमणय् वःम्ह भारतीया प्रधानसेनापति विजय कुमार सिंहं नं थ्वहे खँ न्ह्यःने तयाः नेपाःया प्रधानसेनापतिलिसे वार्ता यानादीगु खँ सूत्रं धाःगु दु। नेपाः व भारतया लँपु जुयाः थःपिनि गतिविधि अप्वयेकाच्वंपिं आतंकवादी पुचःतय्त गय् यानाः नियन्त्रणय् कायेगु धइगु विषयय् जूगु वार्ताया झ्वलय् तुं भारतीय पक्षं थ्व खँ नं न्ह्यथंगु खः ।

नेपाःया लँपु जुयाः लश्कर-ए-तोएबा भारतय् दुहां वयाच्वन धकाः वःगु थ्व खँया स्वापू माओवादीलिसे नं दुगु खँ सूत्रं धाःगु दु। छाय्धाःसां छुं ई न्ह्यः तिनि भारतं भारतीय माओवादी व लश्कर-ए-तोएबाया गुरिल्लातय्त नेपाःया माओवादीं नेपाःया हे जंगलय् तयाः तालिम बियाच्वन धकाः द्वपं बियाहःगु खः। आः भारतं लश्कर-ए-तोएबाया मनूत नेपाः जुयाः अथें भारतय् दुहां वःगु मखु उपिं नेपालय् माओवादीपाखें गुरिल्ला तालिम कयाः जक भारतय् वःपिं खः धकाः पुष्टि यायेत स्वयाच्वंगु खँ नं सूत्रं धाःगु दु ।