अप्वया वनाच्वंगु मतया लोडशेडिंग

नेपाल विद्युत प्राधिकरणं लोडशेडिंगया ई हानं अप्वयेकूगु दु। न्हूगु पिकाःगु धलः कथं आः न्हिं ११ घौ लोडशेडिंग याइगु जूगु दु। थ्व ई आः छुं न्हि लिपा हे हानं थकयाः न्हिं १४ घौ तक लोडशेडिंग यायेमालीगु खँ धाःगु दु ।

प्राधिकरणपाखें लोडशेडिंगया ई थुकथं थकयाच्वंगु दु मानौं प्राधिकरणया ज्या धइगु हे लोडशेडिंग यायेगु खः।
लोडशेडिंगपाखें देशय् छु गज्याःगु लिच्वः लाइ धइगु खँ धयाच्वनेम्वाः। उद्योगधन्दा ला थुकिं चौपट हे जुइधुंकल। देशय् थौंकन्हय् उलि उद्योग कारखानात चले मजूगुलिं जक प्राधिकरणं न्हिं १४ घण्टाया लोडशेडिंग याये फयाच्वंगु खः। आः नं न्हापा थें हे कारखानात चले जूगु खःसा प्राधिकरणं थुलि नं मत बी मफइगु खँ विज्ञतय्सं धायेगु याः। देशय् चीधंगु उद्योग कारखाना चले याइपिं मनूत लोडशेडिंगया इलय् थःपिंसं तःधंगु हे घाटा फयेमालीगु खँ कनेगु याः। छगू अनुमान कथं लोडशेडिंगया जक कारणं वैकल्पिक उर्जा छ्यलीपिंसं दँय् छगू अर्ब तका स्वयां अप्वःया पेट्रोलियम पदार्थ खपत यानाच्वंगु दु। उखे पेट्रोलियम पदार्थ झिके यायेगु ज्याय् नेपाल आयल निगम दँय्दसं हे घाटाय् वनाच्वंगु खँ पिहां वयाच्वंगु दु। निगमं गुलि अप्वः चिकं झिके याइ उलि हे अप्वः थ्वयात घाटा जुइ। लोडशेडिंगपाखें लाकाच्वंगु थ्व छगू मेगु लिच्वः खः।
थुकथं लोडशेडिंग नेपाली जनताया लागिं अभिशाप जुयाच्वंगु खँय् विवाद मदु। तर अथे खयां नं लोडशेडिंग म्हो याना यंकेगु सवालय् सरकारं धाःसा छुं हे पलाः ल्ह्वनाच्वंगु मदु। न छुं न्हूगु योजना शुरु यानाच्वंगु दु न विकल्पय् छुं यायेगु ग्वसाः हे दयेकाच्वंगु दु। दकलय् ग्यानापगु विषय थ्व नं खः ।

More Stories Like this