त्रिवि विरुद्ध आन्दोलनय् सामाजिक संस्था

किपू (झीगु स्वनिगः)

तत्कालिन सरकारं त्रिभुवन विश्व विद्यालयया नितिं किपूमितय्गु बुँ अधिग्रहण याःगु इलय् जूगु सम्झौता कार्यान्वयन यायेमाःगु माग यानाः आः किपुलिइ क्रियाशिल जुयाच्वंगु सामाजिक संघ संस्था नं सतकय् क्वहां वइगु जूगु दु । किपुलिइ क्रियाशील जुयाच्वंगु राजनीतिक दल नापं सरोकारवालातय्सं दयेकूगु सर्वदलीय सर्वपक्षति त्रिवि सरोकार समितिं तयातःगु मागयात पूवंकेमाः धकाः माग यानाः आन्दोलन यायेगु नितिं अथे खलः पुचःत तयार जूगु खः । नेवाः स्वायत्त राज्य मंकाः परिषद किपूया ग्वसालय् वंगु मंगलवाः किपुलिइ क्रियाशिल जुयाच्वंगु सामाजीक संघ संस्थाया प्रतिनिधित दुथ्याकाः याःगु सहलह मुँज्याय् अथे सहमति जुयाः आः सामाजिक संस्थालिसे यायेगु नितिंं किपूया जगतपाल महाविहार संरक्षण संघया प्रतिनिधि केशरत्न बज्राचार्यया नेतृत्वय् छगू पुचः हे दयेकूगु दु ।

आः छुं दिं लिपा हे किपू नगरय् च्वंगु सामाजिक संघ संस्थापाखें नं ऐक्यबद्धता प्वंकाः नेवाः स्वायत्त राज्य मंकाः परिषदपाखें आन्दोलनयात अझ उचाइलय् यंकेगु धकाः नं सहमति जूगु खा मंकाः परिषदं धाःगु दु । नेवाः स्वायत्त राज्य मंकाः परिषदं नेवाः लागाय् दुने लाःगु त्रिभुवन विश्वविद्यालयसं नेवाःतय्गु अग्राधिकार दयेमाः धकाः नं सः थ्वयेका वयाच्वंगु खःसा छुं ई न्ह्यःनिसें आन्दोलन नं यानाः वयाच्वंगु खः ।