उच्च स्तरिय कार्यदलं सहमति याःगु खँय्

२७ दलया मुँज्याय् विवाद

येँ (झीगु स्वनिगः)

न्हूगु संविधान दयेकेगु नितिं जुयाच्वंगु विवाद ज्यंकेत धकाः म्हिगः बुधवाः च्वंगु संविधानसभाया २७ दलया बैठकय् न्यायपालिका सम्वन्धि विवाद जुल ।न्हय्गू दल दुथ्याका दयेकूगु उच्च स्तरीय राजनीतिक कार्यदलं सहमति ब्वलंकूगु न्यायपालिका सम्बन्धि राजनीतिक दलया नेतातय्सं थःथःगु कथं ब्याख्या यायेवं २७ दलया मुँज्याय् विवाद जूगु खः । सिंहदरवारय् च्वंगु उगु मुँज्याय् संवैधानिक अंगया प्रमुख नापं प्रधान न्यायाधीशया नियुक्ती यायेगु नितिं संवैधानिक परिषद थें हे स्वतन्त्र निकाय गठन यायेगु धकाः उच्च स्तरीय कार्यदलय् सहमति जूगु खःसा व हे सवालयात कयाः दलया नेतातय्सं थःथःगु कथं ब्याख्या यायेवं विवाद ब्वलंगु खः । मुँज्याय् एकीकृत माओवादीया नेता देव प्रसाद गुरुङं ब्यागलं कथंया मेगु संयन्त्र दयेकेगु नितिं थःपिन्सं सहमति मबियागु खः धयादिसें उगु संयन्त्रं प्रधानन्यायाधीश, न्यायाधीश व संवैधानिक अंगया प्रमुखत नियुक्त यायेमाःगु थःपिनिगु बटम लाइन खः धयादिल । वय्कलं उगु हे खँ २७ दलया मुँज्याय् तयागु नापं कांग्रेस व एमाले नापं मेमेपिन्सं थःत ज्याछिं कथं ब्याख्या याःगुलिं हे न्यायपालिका सम्वन्धि विवाद जूगु खः धकाः धयादिल ।

उगु मुँज्याय् एमाले व कांग्रेसया नेतातय्सं धाःसा उगु संयन्त्र संवैधानिक परिषद् थें जुइगु जुयाः न्याय परिषद थें मेगु परिषद दयेकेमाः धकाः अडान तःगु खः । उच्च स्तरीय राजनीतिक कार्यदलया मुँज्याय् हे संवैधानिक अंगया प्रमुखत नापं प्रधानन्यायाधीशया नियुक्ति यायेगु नितिं कार्यकारी प्रमुखया अध्यक्षताय् स्वतन्त्र संयन्त्र दयेकेगु धकाः सहमति जुइ धुंकूगु खः ।
संविधानसभाया नायः सुवासचन्द्र नेम्वाङं सःतादीगु उगु मुँज्यां उच्च स्तरीय राजनीतिक कार्यदलं सहमति ब्वलंकूगु राज्यया शासकीय स्वरुप निर्धारण समिति व व्यवस्थापकीय अंगया स्वरुप निर्धारण समितिया प्रतिवेदनयात धाःसा २७ दलया मुँज्यां अनुमोदन याःगु दु । २७ दलया मेगु बैठक वइगु २८ गते सिंहदरवारय् हे च्वनीगु जूगु दु ।