न्यायपालिकाया खँय् २७ दलय् विवाद
शासकिय स्वरुप व व्यवस्थापकीय स्वरुपया खँय् अनुमोदन
येँ (सन्ध्या टाइम्स)/न्हूगु संविधान निर्माणया ज्याय् वयाच्वंगु पंगः चीकेगु लागिं थनिंनिसें न्ह्याःगु संविधानसभाय् दुथ्याःगु २७ दलया बैठकय् न्हापा न्हय्गू दलया उच्चस्तरीय राजनीतिक कार्यदलय् सहमति जुइ धुंकूगु न्यायपालिकाया सवालय् बिबाद ब्वलंगु दु ।
एकीकृत माओवादीया अध्यक्ष प्रचण्डया नेतृत्वय् दुगु न्हय्गू दलया उच्चस्तरीय राजनीतिक कार्यदलया बैठकं न्यायपालिकाया सवालय् प्रधानन्यायाधीश व संवैधानिक निकायया पदाधिकारी नियुक्तिया नितिं स्वतन्त्र संयन्त्र दयेकेगु धकाः सहमति जूगु अले सर्वोच्चया मेमेपिं न्यायाधीशया सवालय् धाःसा सहमति ब्वलंके मफुगु खः। थौंया २७ दलया बैठकय् सर्वोच्च अदालतया फुक्कं न्यायाधीशत संयन्त्रं हे नियुक्ति यायेमाः धकाः खँ वयेवं बिबाद जुयाः खँ क्वःछी मफुगु खः ।
सिंहदरबारय् च्वंगु थौंया बैठकय् सर्वोच्चया फुक्क हे न्यायधिशत संयन्त्रं हे नियुक्ति यायेमाः धकाः माओवादीया नेतातय्सं अडान कायेवं बिबाद जुयाः न्यायपालिकाया सवालय् सहमति जुइ मफुगु खँ नेपाल मजदुर किसान पार्टीया सांसद सुनिल प्रजापतिं धयादीगु दु ।
सिंहदरबारय् थ्यंमथ्यं स्वघौ तक च्वंगु थौंया बैठकं न्हापा न्हय्गू दलया उच्चस्तरीय राजनीतिक कार्यदलं सहमति ब्वलंकूगु शासकीय स्वरुप निर्धारण समिति व व्यवस्थापकीय स्वरुप निर्धारण समितिया खँयात धाःसा गथे खः अथे हे अनुमोदन याःगु दु ।
संविधान दयेकेगु नितिं विवाद जुयाच्वंगु विषय ज्यंकेगु नापं कार्यदलं सहमति याना हःगु खँय् सहलह ब्याकाः सहमति ब्वलंकाः संविधानसभाय् छ्वयेगु नितिं धकाः थनिनिसें अथे संविधानसभाया अध्यक्ष सुवासचन्द्र नेम्वाङया सक्रियताय् संविधानसभाय् दुथ्याःगु २७ दलया बैठक च्वंगु खः ।
थ्वया हे दथुइ आः २७ दलया मेगु बैठक सिंहदरबारय् आः वइगु १८ गते सुथय् ८:३० ताः इलय् च्वनीगु जूगु दु।
संविधान निर्माणया सवालय् न्हय्गू दलया उच्चस्तरीय राजनीतिक कार्यदलं २१० विवादित विषयत मध्ये १२७ या समाधान याःगु खःसा ८३ गू विवाद धाःसा ल्यं हे दनि।
आः संसदय् दुथ्याःगु २७ दलय् सहमति जुइ धुंकाः अनंलिपा संविधानसभाय् यंकाः अनं नं अनुमोदन याये धुंकाः जक संविधानया मस्यौदा तयार जुइ ।
