थौंया नेतावर्गयात ध्यान शिविरय् छ्वयेमाल

लोकबहादुर शाक्य

साधनाया निरन्तरतां दुःख मुक्ति
ध्यान अभ्यास याइपिं साधकतय्सं थः तथा म्हसिउपिं द्वलंद्वः साधकपिनि अनुभवया आधारय् धायेफु कि थुगु प्रक्रियाया अभ्यास लँपुइ गनं गुगुं नं अलौकिक चमत्कार मदु। गुगु उपलब्धि जुयाच्वनी थःगु कठिन परिश्रमया लिच्वः कथं हे जुइ। थःके मनया दुने खिति दयाच्वनी। ध्यान अभ्यासपाखें साब्वं थें विधि प्राप्त जुइ। थ्व साब्वं गुलि प्रयोग यात उलि खिति मदया वनीगु जुल। मानसिक खिति दत्तले दुःख दयाच्वनी। जीवनया न्हिथंया ज्याखँपाखें कर्म दइगुलिं धर्म चित्त उत्पन्न यानाः सचेत जुयाः खिति सिलाछ्वयेगु कुतः निरन्तर याना च्वनेगु ल्वःमंके मजिल। थ्व कुतः धइगु ध्यान चर्या जुल। अभ्यासया निरन्तरतां खिति सफा जुयाः दुःख नं मदया वनी ।

दुःखया हेतु कर्म संस्कार:
मनू जुयां नं विवेक बुद्धि मदयाः पशु सरह जुयाच्वंपिं नं खनेदु। थज्याःपिंसं द्वलंद्वः दुषित कर्म याःसां गुलिं सर्व शक्तिमान तथा करुणासागरपिं दु धकाः कल्पना यानाच्वनी। अले उमित प्रसन्न यात कि दक्व दुःख मदयेका बी धाइगु जुल। थ्व झ्वलय् खुशामद यायेगु, कोशेली बीगु नं जुयाच्वनी। अन्ध भक्तिया भावावेशय् न्हूम्ह भगवान् नं सिर्जना याइगु जुल। मानसम्मानपाखें प्रसन्न जुइम्ह थ्व भगवान् गज्याःम्ह जुइ?

अतिशयोक्तिपूर्ण प्रशंसा प्रशस्ति तथा खुशामदपाखें दङ्ग जुइम्ह हँ। भेट अर्पण यानाः थःगु प्रशंसा याइपिंनाप खुशी जुयाः हाकुयातनं तुयू यानाबी फु हँ। गुलिं सम्प्रदायया थःथः भगवान् दयाच्वनी। वपाखें सम्प्रदायया पक्ष लिनाच्वनी हँ। हानं गनं देय्या व्यवस्थाय् थज्याःपिं शासकया जिम्माय् लानाः पक्षपाती, दम्भी, निरंकुश जुयाच्वनी। धर्म विधान हुटे यानाः नियम कानून क्वत्यलाः मनमानी याइपिं नं दयाच्वन। थ्व ला दुर्गुणया भण्डार हे धायेमाल। थज्याःपिं उलफट्यांग ज्या याइपिंपाखे नं जनतां दुःख सियाच्वंगु दु। यथार्थ थुइके माःगु खँ ला दुःखया कारण सुं नं देव अथवा जगदीश्वर मखुसें थःके मुनाच्वंगु कर्म संस्कारया कारणं खः। थ्व खँ वाःचायेकाः सचेत जुयाः ज्याखँ यायेगु हे विवेक बुद्धि सही कथं छ्यलेगु खः ।

दुर्गुणपाखें मुक्ति हे सुख अनुभूति:
दुःखया कारण चित्तया खिति खः। चित्तया खिति यच्चुक सिला छ्वये फतकि दुःख विमुक्ति जुइगु जुल। थ्व अटल नियम विधान स्पष्ट यायेफतकि चित्त विशुद्धिया तातुना धर्मया लँपुइ न्ह्यज्यायेगु जुल। विधान पालन यायेगु मू कर्तव्य जुल। विधान हे विधायक जुइगु, नियम हे नियामक जुइगु खः। धर्म धारण मजुल कि अमङ्गल ब्वलनी, धर्म धारण याये फत कि मंगल हे जुयाच्वनी। विधान, नियम, सत्य, धर्मपाखें निर्वाणया लँपुइ वने फइगु जुल। हानं सत्यया ज्याखँ श्रद्धापूर्वक अनुशरण यात कि धर्म दर्शनया अभ्यास जुइगु जुल। अले दुःख विमुक्त नं जुया वइ। थ्व अवस्थाय् प्रकृतिया शुक्ष्मतर सत्य नाप समरस जुयाच्वनी। सच्चा लकसया प्रभावं धर्मपाखें रक्षा जुयाच्वनीगु नं जुल। स्वयागु नं खुशामद याये माःगु नं मदु। मू खँ ला मन दुर्गुणपाखें मुक्त जुयाः निर्मल जुल कि सद्गुण भय्बिया वइ अले सुख संरक्षण संवर्धन जुइगु जुल। थ्व नियम विधान प्रत्यक्ष अनुभूत जुयाच्वनीगु नं जुल ।

राजनेतातय् दुष्प्रवृत्ति देय्यात खतरा:
गुगुं नं देय्या राज्य विधान व देय्या धर्म जुयाच्वनी। थुगु हे कथं सार्वदेशिक, सार्वजनिन, सार्वकालिक विश्व विधान नियम विश्व धर्म जुल। गुगुं नं मुलुकया नागरिकं राज्य विधान कथं जीवनयापन यानाः विधान उल्लंघन मयात कि ग्यायेमाःगु मदु। वया सुरक्षाया जिम्मेदारी राज्य हे जुयाच्वनी। तर राज्यया ऐन कानून पालन मयात कि दण्ड भोगे याये मालाच्वनी। खराब प्रवृत्तिं यानाः थःत जक मखु समाज व देय्या सुख शान्तिया नापं व्यवस्थाया नितिं नं खतरनाक जुयाच्वनी। गुगु देय्या नागरिकतय्सं राज्यया ऐन कानून नियम पालन याइ व देय् तथा समाजय् सुख शान्ति जुयाच्वनीगु जुल। थुगु हे प्रकारं विशाल विश्व राज्यय् नं विश्व विधानरुपी धर्म पालन यानाच्वंसा सुख शान्ति जुयाच्वनीगु जुल। उकिं थःगु जक सुख शान्तिया निंतिं मखु सकलया सुख शान्ति लागि धर्म धारण याये माल। विश्व विधान अनुकुल जीवन निर्वाह यायेत अटूट निष्ठापूर्वक धर्म दर्शनया चर्यापाखें चित्तया विकार विहीन जुइमाल। कार्यक्षेत्रय् गुगुं नं कण कणय् मंगलमय परम सत्य धर्मय् दृढ जुयाच्वने ल्वःमंके मजिल ।

दण्डहीनतां अराजक स्थिति महयेमा:
च्वय् न्ह्यथनातःकथं देय्या नागरिकतय्सं राज्यया ऐन कानून नियम श्रद्धापूर्वक पालना यात कि देय् व समाजय् सुख शान्ति जुयाच्वनी। थौंकन्हय् नेपाःया परिस्थिति वालास्वयेबलय् राज्यशासन सुचारु रुपं संचालन मजुयाः नाजुक अवस्था जुयाच्वन। कयौंसिनं ऐनकानून नियम पालन मयानाच्वन। थुकिया मू कारण धइगु शासन चले याइपिं न्ह्यलुवातय्गु बेमेल मछाः मजू पह व अदूरदर्शिता खः। तःधंगु दलत थःथः ल्वानाच्वंगु जक मखु छगू दलया दुने नं विवाद जुयाच्वन, प्रधानमन्त्री नापं ल्यये मफयाः बेइज्जत जुयाच्वन। अझ मुख्य कारण ला उच्चपदया लोभं बांमलाःगु स्वार्थ ब्वलनाच्वन। भूल स्वीकार यायेगु नैतिकता मदु धायेमाल। निदँया दुने संविधान दयेके मफुगु दुर्भाग्य जुल। दछि थपे याःगु नं खुला फुइ हे धुंकल। यथार्थ खँ सर्वश्रेष्ठ मनू धयातःगुया गुण विवेक बुद्धि सदुपयोगु याये मफयाः न्ह्यलुवा धाःपिं पशु सरह जुयाच्वन। आः अनमिन लिहां वनीबलय् झन हे अराजकता जुइगु शंका जुयाच्वंगु दु। छुं दिन न्ह्यः नेपाः झाःम्ह संयुक्त राष्ट्र संघीय राजनीतिक मामिला सम्बन्धी उपमहासचिब वी लिन पास्कों शान्ति प्रक्रिया कठिन मोडय् थ्यंगुलिं सेना समायोजन पुनः स्थापना तथा सत्तासाझेदारी व न्हूगु संविधान च्वयेगु विषय याकनं क्वःछीन इनाप यानादीगु खः। थ्व विषयय् शासक व दलया न्ह्यलुवातय्सं दृष्टि तयाः सहलह ब्याकाः समाधान यायेमाल, नत्र देय् बरबाद जुइगु बेर मदु। उकिं समस्या ज्यंकेत न्ह्यलुवातय्सं विवेकपूर्वक सचेत जुयाः राष्ट्रिय भावना ब्वलंकाः कणकणय् मंगलमय परम सत्य धर्मय् दृढ जुयाः न्ह्यज्यायेत आह्वान यानाच्वना ।

(सन्दर्भ सफू: आचार्य सत्यनारायण गोयन्का कृत 'धर्म आदर्श जीवनया आधार' )

More Stories Like this