आः च्वनेत्यंगु संसदया नियमित अधिवेशन

प्रधानमन्त्रीया सिफारिसय् राष्ट्रपतिपाखें संसदया विशेष अधिवेशन आह्वान यानादीगु दु। थ्वहे वइगु पुस २५ निसें आः संसद शुरु जुइगु जूगु दु। संसद सःतेगु लागिं माओवादी लडाकुयात सेना समायोजन विशेष समिति मातहत तयेमाः धकाः यानाच्वंगु शर्तयात त्वःतूगु दु। न्ह्यागुसां सरकार व प्रतिपक्षी मिले जुयाः विशेष अधिवेशन बन्द यानाः नियमित अधिवेशन सःतेगु ज्या जूगु दु, थुकियात सकारात्मक रुपं कायेमाः ।

संसदया अधिवेशन शुरु जुइ धायेवं हे न्ह्यसः पिहां वइ, आः थ्व अधिवेशनय् प्रधानमन्त्रीया चुनाव छु जुइगु खः? प्रधानमन्त्री ल्ययेगु लागिं न्हापा जुयाच्वंगु चुनावय् कांग्रेसया नेता रामचन्द्र पौडेलया उम्मेदवारी जारी हे दनि। वय्कलं उम्मेदवारी लित मकाल धाःसा प्रधानमन्त्री ल्ययेगु ज्या अझ नं अन्यौल जुइगु स्थिति दु। नेपाःया राजनीतिक पार्टीया नेतात दुगु समस्यायात मदयेका छ्वयेगु सिबें नं मदु मदुगु समस्यायात हानं हानं पित हयाः समस्यायात झन् झन् जटिल यायेगु ज्याय् गुलि माहिर धइगु खँ थ्व प्रधानमन्त्री चुनावं नं बांलाक हे क्यनाच्वंगु दु ।

थ्व बाहेक आः च्वनीगु संसदया मू ज्या छु जुइ धइगु खँ नं अन्यौलय् लानाच्वंगु दु। थुकिया बिजनेस बारे स्पष्ट खँ पिहां मवःनि। राजनीतिक पार्टीतय् अन्य मुद्दां यानाः संसद व संविधानसभाया ज्याखँत भद्रगोल अवस्थाय् लानाच्वंगु दु। थ्व निकायतय्सं यायेमाःगु संविधान निर्माणया ज्या ला झन गन खः गन धाःसां जिउ। आः च्वनीगु संसदया नियमित अधिवेशनं नं देशय् कायम जुयाच्वंगु समस्याया समाधान लुइके मफुत धाःसा स्थिति झन् स्यना वनीगु खतरा दु ।

More Stories Like this