भिक्षुया कला ब्वज्या

भिक्षु व श्रामणेरपिं धइपिं बुद्ध धर्म दर्शनया प्रचार प्रसार व उकिया उत्थानय् लगे जुयाः थःगु जीवन हनाच्वनीपिं धइगु ला झीसं सिउगु हे खँ खः। तर भिक्षुपिंसं आपालं साहित्य च्वःगु, भाषा अध्ययन यानाः मेपिंत नं भाषा साहित्यया लँपु क्यंगु नापं जीवन दर्शनयात ध्वाथुइकेगु ज्या थीथी कथं याना वयाच्वंगु झीसं खनाच्वनागु दु। थ्व झ्वलय् आः नकतिनि हे जक थेच्व जात्राया झ्वलय् थनया स्थानीय ल्याय्म्हतय्सं ग्वसाः ग्वःगु छगू किपा ब्वज्याय् छम्ह स्थानीय भिक्षुं थःगु मौलिक किपा ब्वज्या न्ह्यब्वःगुयात थन न्ह्यथनेबहःगु प्रतिभा कथं कायेछिं ।

'जिगु देय् जिगु गौरव' नामं ब्वज्या न्ह्याःगु उगु किपा ब्वज्याय् छम्ह बौद्ध भिक्षुपाखें नं नेपाःया म्वाःद्यः कथं कयातःम्ह कुमारीया भब्य किपा, सांस्कृतिक जीवनया महत्वपूर्ण पक्ष ख्वप लाय्कू दरवार नापं आपालं अज्याःगु हे सांस्कृतिक व नेपाली सम्पदाया च्वन्ह्याःगु पक्षयात कियाः श्यामश्वेत किपात ब्वःगु खः। ललितकला क्याम्पसय् फाइन आर्ट विषय कयाः स्नातक स्वंगूगु दँय् अध्ययन याना च्वनाबिज्याःम्ह भिक्षु उत्तमं ब्वज्याय् थः हे सहभागी जुयाः स्वकूमिपिंत मानव जीवनय् चित्रकलाया महत्वबारे नं ध्वाथुइकाच्वंगु खः ।

भिक्षु धायेवं त्यागी व संसारनापं अलग्ग तायेकीपिं नं आपालं दु। तर सांसारिक थें जीवनय् भोग बिलाश स्वयां तापाना च्वंसां तबि नं जीवननापं भिक्षुपिं उलि हे सतिका च्वना बिज्याइगु जुयाच्वन धइगु बांलाःगु प्रमाण थ्व किपा ब्वज्या नं खः। थेच्व जात्राया झ्वलय् जूगु उगु किपा ब्वज्याय् भिक्षु उत्तमया जक अन पीपाः किपा ब्वज्या जूगु खः। उकी न्याद्वः तका दां वंगु किपा छपाः ला छम्ह हितैषीं न्याना नं यंकूगु खः। बेलुवान विहार थेच्वय् च्वनाबिज्याःम्ह वय्कः भिक्षु खोनाया काय्मचा खः। वय्कःया गृहस्थी नां रविन्द्र डंगोल खः। नीन्यादँ बैशय् थ्यनाच्वंम्ह वसपोल भन्तें कुमारी व ख्वप लाय्कूया दरवार नापं आपालं किपात अन उलि हे बांलाक च्वयाः ब्वयातःगु खः। पुस ६ गतेनिसें ९ गते तक उगु ब्वज्या जारी जुयाच्वंगु खः ।

जल रंग जक छ्यलाः दयेकातःगु थुगु नेपाली संस्कृति पिब्वइ कथंया किपा ब्वज्याय् थिमिया राजेशकुमार श्रेष्ठ व यलया इशान बज्राचार्यया किपात नं ब्वयातःगु खः। थेच्व किपा ब्वज्या ने.सं. ११३१ नां तयाः प्यन्हु तक जूगु खःसा उगु किपा ब्वज्या थेच्व नापं स्वनिगःया थीथी थासं थेच्व जात्रा स्वयेत वःपिं आपालं स्वकूमिपिंसं ययेकाः स्वयावंगु खः। गुलिसिनं उगु ब्वज्या स्वल फुक्कं थें तुं उलि हे प्रभावित जूगु खने दत। ललितकला क्याम्पसय् ब्वनाच्वंपिं थ्व विद्यार्थीतय्सं छगू ल्याखं द्याःत्याः मधासें नेपाःया गौरवयात उजागर यानाः झीगु सांस्कृतिक गौरवयात च्वन्ह्याकेगु लक्ष्य तयाः थुगु किपा ब्वज्या याःगु खः ।

More Stories Like this