भाग्यमानी नेपाल

नरेन्द्रमान श्रेष्ठ गोगंजु

हलिमय् दकलय् भाग्यमानी नेता सु धकाः न्ह्यसः तल धाःसा लिसः पक्कां नं नेपाःया भाजु 'माधवकुमार नेपाल' हे वइ जुइ। खय् भाषाय् 'भाग्यमानीको भूतै कमारो' व 'लेखेको पाइन्छ, देखेको पाइँदैन' धइगु धापू दु। थ्व धापू थौंकन्हय् माधवकुमार नेपालं चरितार्थ यानाच्वंगु दु। संविधानसभाया चुनावय् वय्कः रौटहट व येँ निगू निगू थासं बुत। तर नं संविधानसभाया थः हे छम्ह सभासद्यात सहिद धकाः वय्कः संविधानसभाया सभासद जुयादिल, वयां लिपा प्रधानमन्त्री नं जुयादिल। संविधानसभाया चुनावय् निगू निगू थासं त्याःपिं माओवादीया अध्यक्ष प्रचण्ड, उपाध्यक्ष डा. बाबुराम, एमालेया झलनाथ खनाल, नेपाली काँग्रेसया रामचन्द्र पौडेल थेंज्याःपिं खुँखार नेतातय्त छखे लाकाः माधव कुमार नेपाल प्रधानमन्त्री जुयाच्वंगु दु कि जुयाच्वंगु दु ।

माधवकुमार नेपाल भाग्यमानी जूगुया यक्व कारण दु। वय्कः निगू क्षेत्रं पराजित जूम्ह नेता जक मखु न्याला-न्याला तक कामचलाउ प्रधानमन्त्री नं जूम्ह नेता खः। आः तकया नेपाःया इतिहासय् न्याला न्याला कामचलाउ प्रधानमन्त्री जूम्ह नेता वय्कः बाहेक मेपिं सुं मदु। नेपाः जक मखु हलिमय् हे थुज्वःगु राजनैतिक खेल दुर्लभ धाःसां जिउ। संविधानसभाया चुनाबय् त्याःम्ह काँग्रेस नेता रामचन्द्र पौडेल प्रधानमन्त्री जुइ धकाः गुलि सनाच्वन, तर जुइ मफु। याकःचा हे प्रधानमन्त्रीया प्रत्यासी जुलं नं पौडेल प्रधानमन्त्री जुइ मफु। माधव नेपाल धाःसा चुनाव हे बूसां नं आरामपूर्वक प्रधानमन्त्री। अले मजू ला वय्कः भाग्यमानी नेता?

कांग्रेसया प्रभावशाली नेता, संसदीय दलया नेता रामचन्द्र पौडेलया प्रधानमन्त्रीया कुर्सीइ फ्यतुनाः प्रधानमन्त्री छक्वः धायेकेगु तःधंगु हे इच्छा। प्रधानमन्त्रीया कुर्सीइ च्वनाः न्हय्गू पुस्तायात गाक्क कमे यायेगु, थःथिति, पासापिंत तःधंगु पोष्टय् जागिर नकेगु, कलाःलिसे विदेशय् चाःहिउ वनेगु वय्कःया तःधंगु इच्छा। यदि अथे मखुसा झिंच्याक्वः तक बूसां हानं छाय् चुनाव ल्वायेगु धकाः सुरे जुयाच्वंगु? इच्छा जक दयां छु याये, वय्कःया भाग्यय् प्रधानमन्त्री जुइगु च्वयातःगु हे मदु। थुखे पौडेलया हालत थथे जुयाच्वंगु दुसा उखे कामचलाउ प्रधानमन्त्री माधव नेपालया धाःसा विदेश चाःहिहिउँ हे लिमलाः ।

माधवकुमार नेपालयात भाग्यमानी जक धयां मगाः, तसकं भाग्यमानी धायेमाः। नेपाःया इतिहासय् गबलें मजूगु घटना, दुर्घटनात माधवकुमार नेपालया हे पालय् जुयाच्वंगु दु। नेपाःया राजनैतिक इतिहासय् सायद हे थुज्वःगु घटना जुल जुइ। व्यवस्थापिका संसदय् बजेट भाषण यायेत ठीक्क जुयाच्वंम्ह अर्थमन्त्री सुरेन्द्र पाण्डेयात विपक्षी सभासद्तय्सं मुक्का नकूगु घटना, सभासद�सभासद दथुइ साधारण ल्वापु जुइगु व मुक्कामुक्की जुइगु ला मेमेथाय् नं जू, तर बजेट भाषण यायेत तयार जुयाच्वंम्ह अर्थमन्त्रीयात दायाः ब्याग लाकाः यंकेगु घटना सायद हे जक गनं जुल जुइ। विश्वय् गनं नं मजूगु घटना नेपालय् कामचलाउ प्रधानमन्त्री माधव नेपालया पालय् जुयाच्वनव। अलय् मजू ला माधव नेपाल भाग्यमानी नेता?

कामचलाउ प्रधानमन्त्री भाग्यमानी जूगुलिं वय्कःया पालय् ६०१ म्हं हे सभासदत नं भाग्यमानी जुयाच्वंगु दु। ६०१ सभासदतय् ल्वा जक ल्वानाः भत्ता नये खनाच्वंगु दु। अल कामचलाउ प्रधानमन्त्री राज्यया धुकुतिं विदेश चाःहिलाः मोज यानाच्वंगु दु। छखे माधवकुमार नेपाल भाग्यमानी जुयाच्वंगु दुसा मेखे रामचन्द्र पौडेल धाःसा अभागी जुयाच्वंगु दु। प्रधानमन्त्री जुइत चुनाव जक त्याकां मगाः, पार्टीं साथ बियां नं मगाः। भाग्य नं दयेमाःगु जुयाच्वन।
नेपालय् राजनैतिक पार्टीया नेताय् राजनीति यायेगुया उद्देश्य धइगु हे पद, पावर व सत्ताय् मोज यायेगु जक खः। खय्त ला राजनीतिया उद्देश्य धइगु हे सत्ता कायेगु खः। अथे खःसां सत्ता प्राप्तिया नापनापं देश व जनताया आर्थिक उन्नति, देशय् शान्ति सुव्यवस्था कायम यायेगुयात नं महत्व बीमाः। विकसित देशया नेतातय्त स्वयेगु खःसा इमिसं सत्ता प्राप्तियालिसें देश व जनताया आर्थिक उन्नति व प्रगतिया बारे नं उलि हे चिउताः तयाच्वंगु दइ। तर नेपाःया नेतातय्गु धाःसा "आफू भलो त जगतै भलो" धइथें जुयाच्वंगु दु। थनया नेतातय्गु निंतिं ला सत्ता हे तःधं। सत्ता प्राप्तिया लागिं न्ह्यागु अमर्यादित व असभ्य ज्या याःसां जिउ धइगु मानसिकता उमिसं ज्वनाच्वंगु दु ।

देय्या स्वंगू पार्टी - माओवादी, एमाले व काँग्रेस नेतातय् स्वःपाः ख्वाःपाः स्वथाय् हे स्वः। राजनैतिक पार्टीया नेतातय्गु थुज्वःगु व्यवहार जुइधुंकाः देशया विकास गनं जुइ? थौं देशया शान्ति सुव्यवस्था व शान्ति सम्झौता झ्वाकलय् दुनाच्वंगु दु। संविधान च्वये धकाः संविधानसभाय् थ्यंपिं सभासदतय्सं व्यवस्थापिका संसदयात महाभारतया कुरुक्षेत्र दयेकाच्वंगु दु। आः जेष्ठ १४ गते वयेत नं प्यला जक ला ल्यंद नि। अझ नं जनतायात न्हूगु गणतान्त्रिक संविधान मबीगु विचाः दु थें च्वं। देशया अवस्था स्वयेगु खःसा संसदंनिसें सतक तक अराजक गतिविधित न्हियान्हिथं अप्वयाच्वंगु दु। देशया स्थिति झनझन भयावह जुयाच्वंगु दु। अशान्ति, असुरक्षा, अपहरण, अभाव, हत्या�हिंसा, लुटपाट, बलात्कार, भ्रष्टाचार, कमिसनतन्त्र, घुसखोरी, ठगी, महंगी, लःया हाहाकार, लोडसेडिङ्ग थेंज्याःगु समस्या आः झीगु नियती जुयाच्वंगु दु। स्वःस्वःथाय् तक अस्तव्यस्त, भताभुङ्ग व लथालिङ्ग अवस्था दु। तर नेतातय् धाःसा सत्ताधारी गिद्ध जुयाः, लाजशरम बर्‍हः तयाः नैतिकता तकं मियाः मोजमस्ती यानाच्वंगु दु मानौं देशया सत्ताय् च्वनेगु, प्रधानमन्त्री जुइगु, सभासद जुइगु धइगु थःथःगु स्वार्थ पूर्तिया निंतिं जक खः। देश व जनताया लागिं दुर्योधन, रावण व कंस जुयाच्वंपिं थ्व नेताय्सं शान्तिया अग्रदुत भगवान बुद्ध अले सीताया जन्मभूमियात गन थ्यंकीगु खः थ्व ला "भगवान जानून" धाःथें जुयाच्वंगु दु ।

More Stories Like this