राज्य व्यवस्था समिति

येँ (झीगु स्वनिगः)

व्यवस्थापिका संसद अन्तरगत राज्य व्यवस्था समितिया मंगलवाःया बैठकं एपिसि लगायत लजेष्टिक समान खरिदय् करोडौंया घोटाला याईपंत याकनं कारवाही यायेत अख्तियार दुरुपयोग अनुसन्धान आयोगयात उजं ब्यूगु दु । नापनापं राज्य व्यवस्था समितिया मंगलवाःया वैठकं एपिजी लगायतया युद्ध सामाग्री न्यानाः सुडान छ्वयेत सरकारयात हाकनं उजं ब्यूगु दु । थ्व स्वयाः न्ह्यः सुडान छ्वःगु सामानत गुणस्तरहीन जूगु व उकिइ स्वीगू करोड भ्रष्टाचार जूगु खँ पिहाँवःगुलि छानबिनया प्रकि्रया याकनं क्वचायेकाः दोषीयात कारबाही यायेत नं बैठकं अख्तियारयात उजं ब्यूगु खः । सुडानया डारफरय् शान्ति मिसनय् वनाच्वंपि प्रहरीतय्त न्याःगु लजिष्टिकया घोटालाया विषयलय् अख्तियार दुरुपयोग अनुसन्धान आयोगं थ्व स्वयाः न्ह्यः हे अनुसन्धानया प्रकि्रया न्ह्यःने न्ह्याकेधुंकूगु दु ।

शान्ति मिसनय् वंपि नेपाल प्रहरीयात छ्वःगु युद्ध सामाग्री व लजिष्टिकय् करोडौं घोटाला जूगु राज्यव्यवस्था समितिया अध्ययन समिति रिपोर्ट पेश याःगु खः । उगु विषयदथुइ थप अध्ययन व दोषीयात कारबाहीया सिफारिसया निति समिति अख्तियार दुरुपयोग अनुसन्धान आयोगयात जिम्मा ब्यूगु खः । सोमवाः हे यायेधयातःगु सहलह समितिया दुजः लिसे एमाले सभासद् डम्बर बहादुर खड्का सीगु कारण शोक प्रस्ताव पारित यानाः क्वचाःगु खः ।