फाइनान्सप्रति निक्षेपकर्ताया विश्वास म्हो

येँ (झीगु स्वनिगः)

नेपालय् दुगु फाइनान्स कम्पनीइ निक्षेपकर्तां विश्वास यायेगु त्वःतेवं उगु कम्पनीयात निक्षेप सङ्कलनया निति समस्या जुयाच्वंगु दु । छुं फाइनान्स कम्पनीं निक्षेपकर्ताया विश्वासदथुइ घात याःगुलि फाइनान्सप्रति निक्षेपकर्ताया विश्वास म्हो जुयावंगु खः । येँया हरिमाया गिरीं छगू फाइनान्सय् आपालं ब्याज बिइगु धकाः थः भाःतं कतारपाखें कमय् यानाः छ्वयाः हःगु धेबा तःगु खः तर लिपा उगु फाइनान्सं धाःसा निदुगं म्हो जक ब्याज ब्यूगु कारण खाता बन्द यानाब्यूगु दु । न्हापां ला जि फाइनान्सं कर्जा प्रवाह याःबलय् ब्यूगु सुविधायात मध्यनजर यानाः निक्षेप याःगु खः । गिरीं धयादी - तर व कर्जाया ब्याज पुलाःबलय् बैंकपाखें कयाःगु ब्याज स्वयाः निदुगं तुइगु जुयाच्वन उकि नं ग्राहक फाइनान्सलिसे ताःपाःगु खः । इम्पेरियल फाइनान्स कम्पनीया सहायक प्रबन्धक नितु राणा धाःसा छुं फाइनान्स कम्पनीं याःगु बेइमानीया कारण इमान्दार फाइनान्स कम्पनी नं बदनाम जूगु बिचाः तयादिल । करिब झिदँन्ह्यः चायेकूगु इम्पेरियल फाइनान्सय् थुगु दँ धाःसा निक्षेपय् र् हास वःगु स्वीकार यानादिसें राणां क वर्गया बैंकया नामय् चायेकीगु फाइनान्सया कारणं नं निक्षेपकर्ताय् भ्रम सिर्जना जूगु बिचाः तयादिल ।

वय्कलं स्टुन्डर्ड चार्टड बैंक दयेक दयेकं स्टुन्डर्ड चार्टड फाइनान्स चायेकेगु नबिल बैंक दयेक दयेकं नबिल फाइनान्स चायेकेगु थेंज्याःगु खं नं निक्षेपकर्ता अलमलय् जूगु व स्टुन्डर्ड चार्टड बैंकया विश्वासया कारण स्टुन्डर्ड चार्टड फाइनान्सय् निक्षेप याःबलय् उगु फाइनान्सं धोका ब्यूसा समग्र फाइनान्स कम्पनीयात छगू हे थासय् तयाः स्वयेमज्यूगु बिचाः तयादिल । निक्षेपकर्तातय्त फाइनान्सं १३।५ प्रतिशततक्क ब्याज बियाः वयाच्वंगु अवस्थाय् निक्षेपकर्तां फाइनान्सय् छु नं अविश्वास यायेमज्यूगु धयादिसें नेपाल राष्ट्र बैंकं ग वर्गया श्रेणीइ तःगु फाइनान्स यदि धरासायी जूसां नं उगु फाइनान्सयात केन्द्रीय बैंकं नियन्त्रण यायेगु प्रावधान दुगु जानकारी बियादिल । नेपालय् आःतक्क न्यय्खुगू फाइनान्स कम्पनीत दु । उगु फाइनान्स कम्पनीं चालु दँया न्हापांगु आर्थिक दँय् खुद ब्याज आम्दानी ख्वीखुगू करोड स्वंगू लाख दुगु खः । वंगु दँया थ्वहे अवधिया तुलनाय् थ्व पीन्हय्गू प्रतिशतं वृद्धि जूगु खः । चालु आर्थिक दँया न्हापांगु स्वलाय् वृद्धि जूसां नं आः धाःसा थुकथं खुद ब्याज आम्दानीइ वृद्धि जुइत थाकुइगु नं राणाया धापू दु ।

More Stories Like this