ओलीया मिखाय् कांग्रेस एमाले जनावर

स्वराज महर्जन

न्ह्याबलें नं बेक्वयेक खँ तयेगु जक मखु इलय् ब्यलय् न्ह्यःनेलाःथे न्वंवाना एकीकृत माओवादीयात लाक्व पाक्व ब्वबियादीम्ह एमालेया स्थायी समितिया नेता केपी शर्मा ओली । न्हापा जनआन्दोलन २०६३-६३ या जनआनदोलनया इलय् आन्दोलया औचित्य मदु धकाः तकं सार्वजनिक रुपं न्वंवानादीम्ह एमालेया वरिष्ठ नेता केपी शर्मा ओलीं आः वयाः एमाले व कांग्रेसया शीर्ष नेतातय्त जनावर तायेका न्वंवाना हयेगु यानाहःगु दु । न्ह्यःनेलाःथे न्वंवाइगु जुयाः इलय् ब्यलय् संचार माध्यमय् चर्चाय् वयाः हे च्वनीगु वय्कलं म्हिगः मंगलवाः छगू ज्याझ्वःया दथुइ एकीकृत माओवादीया नेतातय्सं वाउँगु घाँय् क्यनेवं एमाले व कांग्रेसया शीर्ष नेतात फैत अलमले जुल धकाः टिप्पणी तकं यानादिल । एमालेया वरिष्ठ नेता ओलीं आःया आवस्थाय् न्हूगु संविधान दयेके मफुगु धैगु माओवादीं क्यंगु वाउँगु घाँय् खनाः अथे नेतात अलमल जूगुिलं हे खः धकाः तकं दावी यानादिल ।

म्हिगः एमाले नाप लिक्क लाःगु पत्रकारतय्गु संगठन प्रेस चौतारीपाखें सप्तरीया राजविराजय् ग्वसाःग्वःगु पत्रकार भेटघाटय् न्वंवायेगु झ्वलय् नेता ओलीं धयादिल एकीकृत माओवादीं वाउँगु घाँय् क्यनेवं कांग्रेस व एमालेया शीर्ष नेतात अल्झेजूगु दु । छुं ई न्ह्यः तक गुगु नं हालय् एकीकृत माओवादीया नेतृत्वय् सरकार दयेकेगु जुइमखु बरु नेपाली कांग्रेसया नेता रामचन्द्र पौडेलयात प्रधानमन्त्री दयेकेमाः धकाः लबिङ यानादीम्ह नेता ओलीं एमालेया नायः झलनाथ खनालयात नं न्ह्यःनेलाःथे धायेगु यानाः वयाच्वंगु दु ।

इलय् ब्यलय् विरामी जूगुलि धकाः भारतय् वनाः वासः याकाः अनया नेतातलिसे सहलह ब्याकाः नेपाःया राजनीतिइ भारतया चाहाना कथं म्हिताः वयाच्वंम्ह एमालेया नेता ओलीं अथे थःगु हे पार्टी व नेपाली कांग्रेसया शीर्ष नेतातय्त जनावरया संज्ञा बियाः न्वंवानादीगुया अवश्य नं छुं अर्थ दयेमाः मखुसा उगु कथं न्वंवानादीमखु जुइमाः धकाः अःपुक हे अनुमान यायेछी ।