सदाशयता खः लाकि आत्मघात?

कृष्ण प्रजापति

थःपिंसं हे सःतूगु विशेष अधिवेशन थःपिंसं हे लित कयाः छगू कथं माओवादीं मेपिं राजनीतिक पार्टीतय्त चकित याना बिउगु दु। अथे जुयाः न्हापांखुसी थुगुसी व्यवस्थापिका संसदया विशेष अधिवेशन प्यन्हु जक चले जुयाः क्वचाल। थुकिं छगू कथं राष्ट्रया ध्यान सिंहदरवारय् जुइ हे मलाकं हाकनं राजनीतिक दलतय् हे क्वाटरय् लाके यंकूगु दुसा विदेशी चलखेल व राजदूतावासतय् सक्रियता नं हानं अप्वइगु खः लाकि धइगु सम्भावनायात नं खुल्ला याना बिउगु दु। आन्दोलन याइगु इलय् आन्दोलनया झ्वलय् बन्दया आह्वान यायेधुंकीगु अवस्थाय् थःपिनि आह्वान प्रति सम्पूर्ण कार्यकर्ता पंक्ति न्ह्यचिले धुंकूगु कारणं बान्हि जक जूसां बन्द यानाः क्यनेगु बांमलाःगु प्रबृत्ति थें माओवादी पार्टीं थौं विशेष अधिवेशन सःते हे धुंकूगुलिं प्यन्हु हे जक जूसां विशेष अधिवेशनया अवधि पूवंकाः पुस ४ गते व ८ गते निन्हु बैठक लिपा विशेष अधिवेशनया प्रस्ताव हे लित कयाः सतक छाप प्रबृत्ति क्यंगु दु ।

खय्त ला आपालं राजनीतिक नेतातय्सं माओवादीयात सहमति मजुइकं न्हूगु अधिवेशन सःतेगु पाय्छि मखु धकाः सल्लाह व सुझाव बिउगु नं खः। तर सहमति हे मजुइकं अधिवेशन सःतेगु इलय् राजनीतिक पार्टीया नेतात जक मखु सम्पूर्ण ६०१ म्ह सभासद्तय् हे ई फ्याये माला वनीगु सीक सीकं नं माओवादीं व्यवस्थापिका संसदया विशेष अधिवेशन सःतेगु निंतिं राष्ट्रपति समक्ष समावेदन दर्ता याःगु खः। उगु समावेदनय् हे न्हूम्ह प्रधानमन्त्री ल्ययेगु निंतिं न्हूगु चुनावी प्रक्रिया शुरु यायेगु प्रस्ताव यानातःगु खः। उगु प्रस्तावयात फेल यायेगु निंतिं सत्तारुढ पार्टीत छथाय् च्वनाः सहलह ब्याकाच्वंगु इलय् लाक्क हे माओवादीं थःपिंसं दर्ता यानागु प्रस्ताव व अधिवेशन आह्वान लित कयागु जानकारी सदनय् बीवं धाःसा विशेष अधिवेशन थुगुसी औपचारिकताय् जक सीमित जुयाः फुना वन। आः हाकनं राजनीतिक दल व उमि नेतातय् दथुइ हे न्हूम्ह प्रधानमन्त्री जुइगु व यायेगु जिम्मेवारी सुयागु धइगु खँय् सहलह यायेमाःगु स्थिति ब्वलंगु दु ।

देशय् जनयुद्ध यानावःगु पार्टी जुयाः माओवादीपाखें छुं भचा आशा कायेगु थाय् दइ ला धकाः नेपाली जनतां आशाकुति मतिं स्वयाच्वंगु खः। तर शान्ति सम्झौताय् वयाः बन्दूक दिकेधुंकाः झन झन हे माओवादीया धारणा फ्यासुयावंगु महसुस जुयावःगु दु। सुथय् छगू खँ बहनी मेगु खँ ल्हायेगु प्रबृत्ति उमि नेतातय् जक मखु मुक्कं पार्टीं नं थःपिनि स्वभाव कथं कायम यानातःगु दु। अथे जुयाः नं खइ विशेष अधिवेशन सःताः अनं हे न्हूम्ह प्रधानमन्त्री ल्ययेगु निंतिं न्हूगु प्रक्रिया शुरु यायेमाःगु प्रस्ताव हःम्ह माओवादी हाकनं छक्वः थःपिनि प्रस्ताव हे लित कयाः वाताहां च्वनाबिउगु दु। जनयुद्ध यानावःगु परिपक्व पार्टीया ल्याखं थुमिगु ज्या तसकं ग्यसुग्यंगु व पाय्छि कथं जुइमाःगु खः। तर जनतां थुमित थुकथं मूल्यांकन याये फयाच्वंगु मदुनि। माओ त्से तुङया नां जक जपे यानाः माओं क्यना थकूगु नीति, सिद्धान्त व विचारया अःखः ज्या यायेत नं थुपिं लिचिला मच्वंगु अवस्था थौं दु। म्हीग ६ डिसेम्बरयात माओया ११८ दँ बुदिं कथं हनेगु ज्या नं शायद हे जक माओवादी पार्टीं याःगु दु ।

न्हूगु सरकार व न्हूगु संविधान दयेकेगु ज्या देशय् दकलय् अप्वः सभासद् त्याकूगु पार्टीया ल्याखं माओवादी अप्वः जिम्मेवार ढंगं प्रस्तुत जुइमाःगु खः। तर थःपिंसं धइथें जक संविधान तयार जुइगु जूसा संविधान दयेकेत न्ह्यचिलेगु, मखुसा न्हूगु संविधान मवयाः देश अन्यौलय् लाःसां वास्ता हे मयायेगु थेंज्याःगु तर्क तकं माओवादीं तयाच्वंगु दु। बहुसंख्यक किसान जनताया उत्थान यायेगु, उत्पादनया मुख्य मुख्य साधनत राष्ट्रियकरण यायेगु, शिक्षा व स्वास्थ्य निःशुल्क यायेगु, जमीन जोते याःम्हेसित बीगु थेंज्याःगु क्रान्तिकारी भूमिसुधारया खँयात माओवादी पार्टीं थःपिनि प्राथमिकताय् तये फयाच्वंगु मदु। यदि झीगु देशय् अप्वः दुपिं किसानतय्त सहज जीवन हनेगु वातावरण चूलाकेगु खत धाःसा न्हापां देशव्यापी रुपं हे जमीन जोते याइम्हेसित बीगु कथं न्हूगु संविधान दयेकेगु इलय् क्रान्तिकारी भूमिसुधार लागू यायेगु खँयात माओवादी थेंज्याःगु झिदँ झिंनिदँ जनयुद्ध यानावःगु पार्टीं बः बीमाःगु खः। तर अथे धाःसा जुयाच्वंगु स्थिति मदु। अथे जुयाः हे माओवादी नं कांग्रेस एमाले स्वयां छुं हे मपाःगु पुँजीवादी पार्टीइ परिणत जूवने धुंकूगु अनुभव जनतां याये मालाच्वंगु दु ।

थथे बारम्बार पुँजीवादी स्वभाव क्यनीगु व प्रतिक्रियावादी शक्तितय् न्ह्यःने पुलिं चुइगु अवस्था वल धाःसा नेपाःया कम्युनिष्ट आन्दोलन व समाजवादी आन्दोलनयात हे तःधंगु नोक्सान जूवनेफु। माओवादीया थ्व सदासयता खः वा वयागु अन्तरर्घात खः थ्व धाःसा इलं क्यनी हे तिनि। थःपिनि पार्टी तःधंकेगु निंतिं जनयुद्ध यानां जिल ला वा चुनावय् धाँधली यानां जिल न्ह्यागु नं यायेत तयार जुयाच्वंगु थ्व पार्टीं आः वाइसीएल विघटन याःगु घटनायात नं गुलिसिनं सदासयता क्यंगु तायेकूगु दुसा गुलिसिनं आत्मघाती जूवनेफुगु महसुस यानाहःगु दु। न्हापा वाइसीएल धकाः जुयाच्वंगु इलय् खुल्ला लुटपाट यानाः जनतायात दुःख बिया जूपिं कार्यकर्तात आः नं सुलाः सुलाः जुइमाःगु अवस्था वयाच्वंगु दु। अथे जुयाः नं आः माओवादीयात ह्वाये नं मछिं पाये नं मछिंगु स्थिति लानाच्वंगु दु। थःपिनि कार्यकर्तातय्त गलत ट्रेन याना जूगुया लिच्वः कथं हे माओवादीं थः कार्यकर्तापाखें आः बांमलाःगु फल भोगे यायेत बाध्य जुयाच्वंगु खः। उकिं धाइ, न्हाय्कं पियां तुलसी सइ मखु ।

ई उलि लिबाःगु मदुनि। नेपाली जनतापाखें राजनीतिक पार्टीतय्सं आपालं खँ सयेकेमाःगु दनि। न्हियान्हिथं नये मखंक मेतहनयात हे जीवनपद्धति तायेकाच्वंपिं इमान्दार जनता व कार्यकर्तातपाखें राजनीतिक पार्टीं श्रमया मूल्य मान्यता व उचित राजनीतिक दर्शनयात कसीइ चुलाः जक लागू यायेगु पार्टीं सयेकेमाःगु आवश्यकता दनि। उकिया लागिं गां, शहर व बस्तीइ वनेगु ज्याय् माओवादी नापं फुक्कं राजनीतिक पार्टीया कार्यकर्तात तयार जुयाच्वनेमाः। खालि सिंहदरवारय् जक च्वनाः नीति निर्देशन लागू यायेत स्वयेगु उकिया गांगामय् प्रभाव छु गज्याःगु दु धइगु वास्ता हे मयायेगु जुल धाःसा कन्हय् सिंहदरवारया निर्णय व अन च्वनीपिं प्रतिनिधितय्त तकं नेपाली जनतां बहिष्कार याये मालेफु। इलय् बिचाः यानाः छु यात धाःसा आपालं जनताया सेवा व हीत जुइ धइगु थुइकेगु हे राजनीतिक पार्टीया दकलय् महत्वपूर्ण धारणा जुइमाः। उकिं हे जक राजनीतिक पार्टी व जनतायात नाप नापं तइगु वातावरण चूलाइ ।

More Stories Like this