अनमिन लिपा लडाकु गन तयेगु?

सम्भवतः माओवादीयात कायल यायेगु लागिं हे जुइमाः, सरकारं संसदया नियमित अधिवेशन सःतेगु लागिं तकं हानं न्हूगु शर्त न्ह्यःने हयाः दलतय् दथुइ जुइधुंकूगु सहमतियात तकं त्वाःथलेगु ज्या याःगु दु। माओवादीं आह्वान याःगु विशेष अधिवेशन लित कायेगु व सरकारं नियमित अधिवेशन हे सःतेगु धकाः दलतय् दथुइ जूगु सहमतिया अःखः आः वयाः माओवादी लडाकुतय्त सेना समायोजन सम्बन्धी विशेष समिति मातहत तये हःसा जक अधिवेशन सःतेगु जुइ, मखुसा सःतेगु मखु धकाः पंगः थनेगु ज्यां अन्ततः शान्ति स्थापना व संविधान निर्माणयात हे पना बीगु निश्चित दु। माओवादी लडाकुयात विशेष समिति मातहत तयेगु ज्यायात माओवादीं विरोध याःगु मदु। थ्व सेना अनमिन मातहत लानाच्वंगु खः। सेना समायोजनया ज्या क्वमचाःतले थुपिं अनमिन अन्तर्गत हे लाइगु न्हापाया कार्यतालिका खः। तर आः सेना समायोजनया ज्या क्वमचायेकं हे अनमिन लिहां वनीगु जूगुलिं लडाकुयात छु मातहत तयेगु धइगु खँय् न्ह्यसः पिहां वइगु स्वाभाविक खः। माओवादीया चाहना धइगु अझ नं अनमिन कायम हे यानाः सेना समायोजनया ज्या सम्पन्न यायेगु खः। उकिया लागिं वं कुतः नं यानाच्वंगु दु। थ्व ज्या प्रक्रिया जारी हे जुयाच्वंगु अवस्थाय् छत्थुं लडाकुयात विशेष समिति मातहत तये हजि धायेवं माओवादीं स्वीकार मयाइगु अस्वाभाविक मखु। विशेष समिति मातहत तयेधुंकाःया अवस्था, व्यवस्था गय् गथे जुइगु खः, उकिया स्पष्ट किपा मदुनि। लडाकुयात वाय्त्यःफ्वाय्त्यः यात धाःसा उकिया लिच्वः सम्पूर्ण देशं फयेमालीगु खँयात ल्वःमंके मजिउ ।

More Stories Like this