अमेरिकाय् नेवाः रेडियो ज्याझ्वः झीगु सः

श्रीकृष्ण महर्जन

अमेरिकाया डल्लास शहरय् फोनिसा एसिया ७०० ए एमपाखें नेपालभाषाया ज्याझ्वः 'झीगु सः' थ्वयाच्वंगु दु।
वंगु मे महिनाया ६ तारिखंनिसें न्ह्याकूगु उगु ज्याझ्वःया मू आज्जु धइगु अमेरिकाया डल्लास शहरय् च्वनाच्वंपिं नेवाःतय्त नेवाः संस्कृतिया बारे जानकारी बीगु, नेवाः एकताया भावना ब्वलंकेगु, नेवाः भाय् त्वःते मजिउ धकाः संदेश बीगु नापं नेवाः म्येँ न्यंकाः मनोरञ्जन बीगु खः। अले थ्व ज्याझ्वः न्ह्याकाच्वंम्ह खः येँनं अध्ययनया झ्वलय् उखे झायाच्वंम्ह भाजु त्रिपुर साय्मिं ।

नेपाःया तराई थें समथर शहर डल्लासय् भारतीय स्टेशन फोन एसिया ७०० ए एम संचालन जुयाच्वंगु खःसा उगु ए एमय् नेपाली भाषाया ज्याझ्वः धकाः खँय् भाय्या ज्याझ्वःया निंतिं न्हिं स्वघौ ई कयातःगु खः। उकी मध्ये नं अन वनाच्वंपिं नेवाःतय्सं वाःया बाघौ ई न्यानाः नेपालभाषा ज्याझ्वः 'झीगु सः' न्ह्याका वयाच्वंगु खः। आइतवाःपतिकं सनिलया ४:३० निसें ५:०० बजे तक 'झीगु सः' ज्याझ्वः प्रशारण जुया वयाच्वंगु दु। न्हापां उगु शहरय् च्वनाच्वंपिं नेवाःत मध्ये स्वयम्भुराज शाक्य, त्रिपुर साय्मि व अमिर मानन्धर जानाः उगु स्टेशनपाखें नेपालभाषा ज्याझ्वः 'झीगु सः' न्ह्याकूगु खःसा लिपा अमिर मानन्धरया थासय् अमृत ताम्राकार वल, अनं लिपा ताम्राकारया थासय् नं आः आशिष्मा नकःमि वयाः स्वम्हेसिया टिमं थ्व ज्याझ्वः न्ह्याकाच्वंगु दु ।

थौंकन्हय् अमेरिकाया डल्लास शहरय् च्वंगु उगु स्टेशनपाखें नेवाः भाय्या ज्याझ्वः न्ह्याकादीपिं त्रिपुरा साय्मि, स्वयम्भुराज शाक्य व आशिष्मा नकःमि खःसा वय्कःपिं स्वम्ह हे उगु ज्याझ्वःया प्राविधिक नं जुयाः ज्या यानाच्वनादीगु दु ।

त्रिपुरा साय्मिं कनादी, 'नेपालय् थें छम्ह प्राविधिक दइगु अले मेम्हं ज्याझ्वः न्ह्याकेगु चलन अन मदु, उकिं जिपिं थःपिं हे प्राविधिक नं जुयाः ज्याझ्वः न्ह्याकाच्वनागु दु। स्वनिगःया नेवाः ज्याझ्वः सञ्चालकतय्सं थें व्यावसायिक कथं जिमिसं ज्याझ्वः न्ह्याकागु मदुनि। थ्व छगू कथं नेवाः जुयाः नेवाः भाय् संस्कृतिया निंतिं छुं यायेमाः धकाः स्वयंसेवकया भावनां ज्या यानाच्वनागु जक खः ।'

'झीगु सः' ज्याझ्वःया स्वरुप म्यागेजिन कथंया खः धयादिसें वय्कलं गबलें गबलें अन्तर्वार्ता नं कायेगु अले नेवाःतय्गु संस्कृतिया बारे जानकारी बीगु यानाच्वनागु दु धयादिल ।

येँया थँहितिइ जन्म जुयाः आखः ब्वनेत अमेरिकाय् थ्यंम्ह साय्मिं अमेरिकाय् च्वनाः नेवाः भाय्या रेडियो ज्याझ्वः न्ह्याकाबलय्या अनभव थुकथं कनादी, 'जिपिं अमेरिकाय् च्वनाः नं नेपालभाषाया ज्याझ्वः न्ह्याकागु इलय् यक्व हे नेवाःतय्सं चिउताः तःगु खने दत। न्यनामित नं यक्व हे दयावःगु दु, न्यनामित मचांनिसें बुराबुरिपिं तकं दु, अमेरिकाय् च्वनाच्वंपिं नेवाः मस्तय्सं फोनया माध्यमं ज्याझ्वलय् ब्वति कयाः नेवाः भाय् ल्हाइगु इलय् जिपिं तसकं लय्तायेगु याना ।'

आःया नितिं लछिया १०० डलर ध्यबा पुलाः वाःया बाघौ ई न्यानाः ज्याझ्वः न्ह्याका वयाच्वनागु खँ कनादिसें उकिया नितिं अमेरिकाय् हे च्वंपिं नेवाः दाजुकिजा तताकेहेँपिंसं ग्वहालि यानाच्वंगु जानकारी नं साय्मिं बियादिल। थःपिंसं 'झीगु सः' नामं फेसबुकय् नं उगु ज्याझ्वः न्यनेगु सुविधा बियातयागु खँ कँसें वय्कलं नेपालय् च्वनीपिं नेवाःतय्सं नं ज्याझ्वः न्यनाः प्रतिक्रिया बीगु यानाच्वंगुलिं थःपिं तसकं हे लय्तायागु दु धकाः नं धयादिल। थौंकन्हय् उगु ज्याझ्वः रेकर्ड यानाः फेसबुकय् तयेगु ज्या सुभाष मानन्धरं यानाच्वंगु दु ।

'झीगु सः' ज्याझ्वः थौंकन्हय् प्रत्यक्ष रुपं नं न्यने फइगु नापं रेकर्ड नं न्यने फइगु ब्यवस्था फेस बुकय् यानातःगु दु।
अमेरिकाय् ज्याझ्वः न्ह्याकादीम्ह साय्मिं धयादी, 'जिमित अमेरिकाय् च्वनाच्वंपिं नेवाःतय्त न्यंकेगु नितिं नेवाः म्येँचाःत माःगु दु, अनया नेवाःतय्सं पुलां पुलांगु नेवाः म्येँ न्यनेगु धकाः इनाप यानादी तर जिमिके म्येँचाः मदयाः समस्या जुयाच्वंगु दु। उकिं स्वनिगलय् च्वनाच्वंपिं संगीत ख्यःया दाजुकिजा तताकेहेँपिंसं ग्वाहालि यानादी धकाः आशा यानाच्वना ।'

More Stories Like this