गंगाराम ! गंगाराम !

नर्मदेश्वर प्रधान

खँयाखँय्

चुनौति बिया। 'हये फुसा धात्थें अबुया काय् खः छ।' जिगु चुनौतिं वयात थी। व छन्हु वइ। 'का ना।' जिगु ल्हाती तयाबी। गर्व याइ। 'फु लाकि मफु, स्व ।'

ख्याः यानागु। जिगु विश्वास। वं फइ मखु। फइ हे मखु। गय् फइ? सम्भव हे मदु। अय्नं हायेके। हायेकाच्वने। जिं सिउ। व अन वं। वनाच्वं। उकिं ग्वाके। उस्के याये। हावा तये। मजाक याये। अय्नं निष्कर्ष जुइ। असम्भव। वं हये फइ मखु। फइ हे मखु। उकिं हे जिं वयात हाथ्या बी। बियाच्वने। पम्प तयाच्वने। वया 'अहं'यात संकाच्वने।
आश्चर्य। तर वं हइ। ल्हाती तया बी। निपाः। गय् गुकथं हल वं मधाः। जिं मसिउ। गय् हल। तर न्ह्याथेसां हइ। बी। सान त्वःती। फूर्ति याये। स्व, जिं हः ला महः? वयागु गर्ववाक्य न्यने। जि नतमस्तक जुइ। धाये। 'धन्यवाद'। हया बिउगु तस्वीरत स्वये। खल्ती स्वथने। धैर्यहीन। खल्तीं लिकाये। स्वये। तुंक स्वये। हानं स्वथने। चक्र हिलाच्वनी। फय्लिंचा थें ।

छखें आनन्द। तर मेखेरं जितः व माकःया गलःथें जुया बी। खल्ती तये। गुलि तये। ग्वःन्हु तये। खल्तिं लिकयाः गनं तये दुसा जिउ। गोप्य थातं। सुनानं मखंक। जि उबलय् मचा ल्याय्म्ह तिनि। थःगु क्वथा मदुनि। क्वथा मबिउनि। निजी दराज। धुकू। मदुनि। ब्याहा मजूनि। मंकाः क्वथा। अन द्यने। न्हिंन्हिं। मामं बँ पुइ। लासा पुइकी। फुंगा चीकी। सफा याइ। अन सुचुके। मामं खनी। खुँ लाइ। अले ....। मती पीर। खल्ती ततं हे भ्वाथः जुइगु खः ला। चनी। सुचुकेगु थाय् दुगु मखु। तयेत ग्यारेज मदु। कमिजया म्हिचा। वहे धुकू। व हे ग्यारेज। अन हे तये। सुरक्षित तायेके। म्हिचाय् तये। द्यने। दने। सुना नं मसिउ। ढुक्क जुइ। याकःबाकः लाइ। खल्तिं लिकाये। स्वये। खूब स्वये। माकुक। धरोहरा च्वकाय् थ्यं थें। फुरुङ्ग जुइ। थौं। व खँत लुमनी। न्हिले वइ। गुज्वःम्ह मचा थें जि। उबलय्। फसय् ब्वयाच्वंगु। जग मदुगु छेँ थें ।

थ्व पीदँ पीन्यादँ न्ह्यःया खँ। उबलय् आःथें मखु। जमाना पाः। थौं ई पायेधुंकल। गाक्कं। उबलय् किपाया जमाना। किपा। खः, भ्वंया मनू। तर भ्वंया मनूया हे ई। थौं जुलं म्वाःपिं मनूतय् जमाना। उबलय् किपा ल्हाती थ्यनी। लङ्का विजय जूगु अनुभूति जुइ। सन्तोष दइ। थौं किपाया जमाना मखइ। ल्याय्म्हत थौं। किपा। भ्वं। भ्वंया मनूया भरय् च्वनी मखु। च्वनेम्वाः। भ्वंया किपा खल्ती सुलाःसुलाः खुयाःखुयाः पुत्तुपुइकाः आनन्द कायेगु। म्हिगःया जमाना। थौं पुलां जुइ। क्वपुलां जुइ। थौं ल्याय्म्हत किपा। भ्वंया मनूया भरय् च्वनेम्वाः। च्वनी मखु। म्वाःम्ह मनू हे इमिसं खल्ती तया जुइ। तयेफु। सुलेम्वाः। निसंकोच। म्वाःम्ह मनूयात पुत्तुपुइकेफु। स्वयेफु। थौंया जमाना खल्ती तस्वीर मखु। म्वाःम्ह मनू हे तया जुइ। खल्ती च्वंगु ग्वय् थें। चकलेट थें। लालिपप थें। माल कि न्ह्याल कि म्वाःम्ह मनूयात हे खल्तीं लिकाइ। न्ह्यइ। नइ। चुचुप्याइ। म्हिगःया खल्ती। थौंया खल्ती सर्गः-पाःताः थें पाइ। गन भ्वंया मनू, गन म्वाःम्ह हे मनू।
०००

उकुन्हु। मरुइ। नापं किजा दु। वं देगः देगलय् पतिंचां सुइ। क्यनी। 'स्व, देगःया जीवन्त कला' धाइ। मती लुइ। किजां अस्यःपिं देगः बखुंतय् चर्तिकला क्यंगु जुइमाः। वा त्वानासिँया किपा, उष्ण चित्रकलापाखेर ध्यान साःगु जुइमाः। तर अथे मखयाच्वनी। वं क्यनी। देगः जायेक म्वःम्वः विद्यार्थीत। आधुनिक देगः बखुंत। उष्ण चित्रत। रसिक मुद्राय् देगलय्। स्वये। देगःत सना हइ। थुखें उखें। धेधे चुइ। दुहां पिहां वयाच्वंगु अनुभूति जुइ। देगः तिंतिं न्हुइ। सर्कसया खेलाडीत थें। देगःत त्यांग्रा पुली। हुस्लुं पुइ। लुमनी। म्हिगःया साम्य, शान्त, मौन देगःत। थौंया अशान्त चञ्चल देगःत खनी। जि तस्वीर जुइ। मौन। सासः हे ल्हाये ल्वःमं थें जुइ। जि म्वानाच्वंगु खः ला मखु। शंका जुइ। थःत न्याक्क कुतिं न्याये मास्ते वइ ।
०००

म्हिगः तस्वीरया युग। तस्वीरया हे भर। तस्वीरया भरय् ययेकी। मययेकी। तस्वीर स्वइ। तस्वीरयात जीवन्त तायेकी। स्वइ। लय्ताइ। सन्तोष काइ। तस्वीरया भरय् इहिपा जुइ। तस्वीरं समाजयात गुण क्यंकी। थौं तस्वीर पियाच्वनी मखु। प्रत्यक्ष नापलाइ। डेटिङ्गय् वनी। दथुइ बार दइ मखु। न्हापा विवाह न्ह्यः तस्वीरया भर। तस्वीर स्वइ। तस्वीरलिसे हे न्हिली। लय्ताइ। बस। आः तस्वीरया थाय् जीवन्त भेटघाटं काइ। नाप लाइ। बिना रोकटोक। पनीगु गनीगु सुनां?। थौं सम्भव जुइ मखु। तस्वीरय् च्वंगु लखं थौं सुनानं प्याःचाःगु लंकेत स्वइ मखु। लःया लागिं हिति हे माः। बुंगाःचा हे माः। थौंया युगं माग याइ।
उबलय्। भ्वंया तस्वीर खल्ती स्वथनाः मख्ख जुयाम्ह। लुमनी। ताइ। भ्वंया स्वां नतुनाः बासय् लठ्ठ जुयाच्वनाम्ह जि। गुलि मूर्ख। ध्वादः। थौं जीवित तस्वीरया जमाना। जि जड थें जुइ ।
०००

कलेजय्। कक्षाय्। आकाझाकां लुमनी। झसङ्ग वनी। कलेज वयेत कमिज हिला वयागु। त्वःतागु कमिजय् लात। निपातं तस्वीर। धोब्या वल जुइ। मामं कमिज बिल जुइ। बी न्ह्यः कमिजय् मामं म्हिचाय् स्वइ। लुइकल जुइ। खुँ लाइ। बायात धया बी। छु याये। ग्याइ। धैर्य तनी। छेँय् वये। कमिज माले। मांयाके न्यने। गङ्गारामं यंकेधुंकल खनिं। 'भ्वं छकू दुगु।' मांयाके न्यने 'जिं मस्वया' मामं लिसः बी। पक्का। गङ्गारामयाथाय् थ्यनेधुंकल। जिं बिचाः याये ।

गङ्गाराम। वसः हीम्ह मनू। न्ह्यइपु। हायेकाच्वनी। 'भ्वय् नकेमाल। काजियात जिं हया बी। व अन नं वं। जिं सिउ। 'गङ्गारामं व किपात। अन थ्यंका बिल कि छु याये?'। बर्बाद जुइ। जि ग्याइ। जिगु धैर्य तनी ।
०००

धोबीचौर। गङ्गारामया छेँ। वने। वयात ह्ययेके। काये। जि सुरक्षित जुइ। बिचाः याये ।

छन्हु। गंगारामयाथाय् वने। गंगाराम नाप लाइ मखु। लिहां वये ।

मेखुन्हु। शनिवाः। हानं वने। 'छेँय् दुहां मवःनि'। लिसः वइ। लिहां वये ।

मेखुन्हु। बहनी। भचा लिबाक्क वने। 'गङ्गाराम ! गङ्गाराम !' छेँ क्वय् च्वनाः सःते। 'मदु मदु'। दुनें लिसः वइ। जि हीमी चाये। निराश जुइ। आशा त्वःते ।

थौं नं। गबलें जि धौबीचौरपाखेर वने। धोबीचौरय् थ्यनी। गङ्गारामया छेँ खनी। व तस्वीरया प्रेतात्मां जितः हय्हय्काः वइ। अले नुगलं जि हाले। तिस्सलं। प्यखेरं थ्वय्क 'गङ्गाराम ! गङ्गाराम !' सः थ्वइ। जिगु नुगः जाय्क प्रतिध्वनित जुइ। गङ्गाराम ! गङ्गाराम !

(पुनश्च: थ्व च्वसुया आधार जिगु छपु बाखं खः। बाखंया रचनागर्वयात न्ह्यथनाच्वना।)

More Stories Like this