नेवाःराज्यया दबुलिइ स्वनिगः बन्दया नाटक

सरकारय् दूगु निगू तःतःधंगु पार्टीयात ग्वहालि यायेत दयेकातःगु विद्यार्थी संगठनं नकतिनि अकस्मात स्वनिगः बन्दया घोषणायात। कारण : इमि थः थः ल्वापु जुयाः छखलकं मेपिन्त खुकुरीं पालाबिल हँ।

४६ सालया परिवर्तन लिपा राजनीतिक पार्टी बल्लानावःलिसे खनेदयावःगु छगू घचायापुगु चलन बन्द खः। न्हापा सा हडताल धायेगु जुइ, मयल कि स्कूल, कारखाना, पसः तिइगु, तिकेगु तकं। तर लिपा ला बन्द धकाः सबारी साधन तकं जुइके मबिइगु जुया वल। सबारी साधन रोके याकल कि छु छु न याना थें खनेदइगु, दकले तसकं जनतायात मर्का बिइगु अले थःगु ज्याखँया स्केल थाहाँ वनीगु जुयाः जनताया साथ मदुपिं व जनताया यः मयःया बिचाः यायेम्वाःपिं पार्टीतय् तकसं यःगु कार्यक्रम खः थ्व बन्द धइगु। उकिसं आयोजकतय्गु ब्यानर व कार्यकर्ता दक्वथासय् वनाच्वने म्वाःगुलिं भचाभचा ध्यबा बियाः सुकुम्बासी व खाते मस्तय्त प्रचुर मात्राय् प्रयोग याइ, ध्यबा दुपिं तर कार्यकर्ता मदुपिं नेतातय्सं। थःगु प्रभाव क्यनेत न्ह्यागुं याइपिं पार्टीतय्सं ब्यवसायिक गुण्डात छ्यलीगु व नियोजित रुपं न्हापा थःत ख्यानातःपिं व बांलागु प्रभाव बियाच्वंगु पार्टी वा पुचःयात सांघातिक आक्रमण यायेगु मौका नं जुयाबिल थ्व।

बन्दया प्रचल अप्वया वःलिसे विस्तारं जनतां नं थ्व विषयय् थःथःगु प्रतिक्रिया क्यनाहल। बन्द याइपिन्त लाक्व पाक्व धयाहल, इलय् ब्यलय् गनं गनं प्रतिकार नं यात। अथे जुयावःलिसे पार्टीतय्सं नं थथेयाये मजिउ धकाः वाःचायेकाहल, गुलिं गुलिं पार्टीतय्सं जिमिसं आवंलि बन्द यायेमखुत धकाः बचं नं बिल। तर थ्व ला बकुला भगत थेंज्याःगु खँ जुल — सरकारय् च्वँतले बन्द यायेमजिउ, यायेमखु धाःगु पार्टीं नं थः सरकारं कुतुं वलकि सरकारया सिमा गयेत छ्यलीगु स्वहाने हानं बन्द हे जुयाबिल। अथे जुयाः जनतायात आश्वासन बियाः बांबांलाःगु सिद्धान्त व योजना ज्वनाः जनताया थाय् क्वहां वयेभाःमखंपिं तर सत्ताय् च्वंपिन्त दबाव बियाः सरकारं कुतुकेमाःपिनिगु थ्व अःपूगु मन्त्र जनतायानिंतिं खाए खा नखाए घिच जुयाच्वंगु दु थ्व बहुदलीय ब्ववस्थाय्।

सत्तापक्षया थुगु बन्दया उद्घाटन यायेत खुला न्ह्यः राजिनामा बिउम्ह प्रधानमन्त्री हे वःगु ला खनेमन्त तर नं सरकारया थुगु बन्दयात सरकारया मौन समर्थन ला दूगु हे जुल।

थुकथं देय् न्यंकया ४० लाख जनता च्वनीगु थ्व येँ दय् ४० म्ह गुण्डातय्गु ल्वापुया कारण न्हिछि धयाथें बन्द जुयाच्वेमाल , पेट्रोल फूगु गाडी थें।

थज्याःगु अवस्थाय् आः थःत विद्यार्थी संगठनया दुजः धाइपिन्सं थः विद्यार्थी लाकि पेशेवर गुण्डा खः धकाः स्पष्ट म्हसिका बिइमाल। विद्यार्थी खः धाइगु जूसा गःपतय् थः गुग स्कूल, क्याम्पसया गुगु तगिंया विद्यार्थी खः व स्पष्ट खनेदयेक ब्वयाः जक सतकय् वयेमाल, व नं शिक्षा नीतिनाप स्पष्ट स्वापू दूगु विषय ज्वनाःजक। मखुसा थन भचाभचा ध्यबा बिलकि न्ह्यागु विषययात कयाः नं सतक बन्द यायेगु थेंज्याःगु अराजक ज्यायाइपिं भाडाया गुण्डात अःपुक कायेगु दु, उमिसं नं अन थःगु नां दर्ता याकेमाल।

अले थ्व ज्याय् राजनीतिक पार्टीतय्गु प्रत्यक्ष संलग्नता दूगुयात मखु धायेफइगु अवस्था मदु। सत्ताया सुख भोग यानाः नं भागवण्डा मिलेमजुयाः कचवं वयाच्वंगु या लिजः जुयाः एमालेया अखिल व नेपाली कांग्रेसया नेविसंघया दथुइ ल्वापु जूगु खः धकाः थनया जनतां बांलाक थू। अज्याःगु अवस्थाय् पार्टीया नेतात थः धाःसा मसिउछु यानाः स्वया जक च्वनेगु नं बांलाःगु राजनीतिक चरित्र मखु। थः उमिगु सम्मेलनय् वनेगु अले आखः ब्वनाः देशया विकासय् तिबः बिइमाल मधासे आन्दोलन यायेत ग्वाकेगु अले उखे उमित ग्वंगः ल्वाकेथें ल्वाकाः लबः कायेगु धइगु नं नेतातय्गु क्वह्यंग ज्या खः धकाः कने माःगु दु।

व स्वयाः मल्ह्वँसे मगाःगु खँ ला छु धाःसा, स्वनिगः व उगुं थुगुं जिल्लायात नेवाः राज्य दयेकेगु धकाः लय् लय् पतिं तामझाम क्यनेगु अले बागबजारयापिं मनूतय्त भोताहितिइ वनेत म्हिगः वःपिं पाखेतय्सं हुँ धाःसा जक वने खनेगु धइगु स्वयं नेवाः राज्यय् च्वनीपिं नेवाःतय्गु हे बेइज्जत खः। थःगु राज्यय् थुभनं म्हमसिउपिन्सं गुण्डाराज याःवलं नं उमिसं अथे यायमते धाःय्गु आँट यायेमफुत। आः छु उमिसं कन्हय् झीत नेवाःराज्य दयेकाबिइ धकाः आसाकुति ख्वालं स्वयाजक च्वनेगु ला? थुलि जुयाः नं न्ह्यलं मचाःसा कन्हय् सिट वलकि ऐसा मजां मुख्यमन्त्रीया पदय् च्वंवनेमानि धकाः संघर्ष समितिया पसः चायेकाः म्हाइपु ख्यानाच्वंपिन्सं थःगु न्हाय्पं चानाबिउसां जिइधुंकल।
फोटो साभार : रिपब्लिका

More Stories Like this