न्हूगु सर्तं माओवादी तम्वल
संसद अधिवेशन बारे थौं स्वंगू दलया शीर्ष नेतातय् बैठक
येँ (सन्ध्या टाइम्स)/न्ह्याबलें नं सहमतिया उल्लंघन याइम्ह कामचलाउ सरकारलिसे आः वार्ता व सहलह यायेगुया औचित्य मदुगु खँ माओवादीं धाःगु दु।
सहमति उल्लंघन याइम्ह सरकारं तःधंगु मूल्य चुके यायेमालीगु ख्याच्वः नं माओवादीं बिउगु दु ।
माओवादी, कांग्रेस व एमालेया दथुइ याकनं नियमित अधिवेशन सःतेगु सहमति जुइधुंकाः नं आः वयाः सरकारं माओवादी लडाकुयात सेना समायोजन विशेष समिति मातहत तये महयेकं अधिवेशन सःते मखु धकाः न्हूगु सर्त तये हःगुलिं आक्रोशित जुयाः माओवादीं आः थ्व सरकारलिसे सहलह यानाच्वने माःगु छुं हे आवश्यकता मंत धकाः प्रतिक्रिया बिउगु खः ।
माओवादी स्थायी समितिया दुजः देव गुरुङं संचारकर्मीलिसे खँ ल्हासें सम्झौता उल्लंघन याइम्ह सरकारलिसे आः वार्ता यायेगुया औचित्य मदु धयादीगु दु ।
वय्कलं धयादिल, 'सहमतिया मसि हे गंके मलायेकं उकिया उल्लंघन जुइसा आः सरकारलिसे वार्ता छाय् यायेगु?'
वय्कलं ख्याच्वः बिसें धयादिल, 'संवैधानिक हैसियत हे मदुगु कामचलाउ सरकारं आः तःधंगु हे मूल्य चुके यायेमालीगु अवस्था वयेत्यंगु दु। आः स्थायी समितिया बैठक च्वनाः थुकियात लिसः बीगु जुइ ।'
म्हिगः मन्त्रिपरिषद् बैठक च्वंगु इलय् आः संसदया अधिवेशन सःते न्ह्यः माओवादी लडाकुत प्रधामन्त्री माधव नेपालया नेतृत्वय् दुगु सेना समायोजन विशेष समिति मातहत हयेमाःगु सर्त न्ह्यःने तयेवं माओवादी तम्वःगु दु ।
थ्वहे दथुइ थौं माओवादीया प्रमुखपिं नेतातय्गु दथुइ सरकारं तये हःगु थ्वहे सर्तया बारे अनौपचारिक रुपं सहलह ब्याकीगु जूगु दु ।
थौं हे माओवादी, कांग्रेस व एमालेया दथुइ बैठक जुइगु जुयाः उगु बैठकय् थःपिं गुकथं प्रस्तुत जुइगु धइगु खँय् सहलह ब्याकेत माओवादी नेतातय् थ्व बैठक च्वनेत्यंगु खः। म्हिगः आइतवाः हे स्वंगू दलया बैठक च्वनेगु धयातःगु खः तर एमालेया सांसद् डम्बर खड्का दुर्घटनाय् लानाः मदुगुलिं म्हिगः बैठक मच्वँसे थौं च्वनेत्यंगु खः ।
सिंहदरवारय् थौं २ बजे लिपा च्वनीगु उगु बैठकय् संसदया नियमित अधिवेशन सःतेगु, न्हूगु सरकार दयेकेगु, सेना समायोजन, अनमिनया म्याद थपे यायेगु वा मयायेगु लगायत न्हूगु संविधान दयेकेगु सवालय् नं सहलह जुइ धाःगु दु। आः सःतीगु अधिवेशनय् न्हूम्ह प्रधानमन्त्री ल्ययेगु प्रक्रिया नं जुइगु ग्वसाः दु तर अधिवेशन हे मसःतल धाःसा माधव हे कायम जुयाच्वनी ।
